Regades di que a lista do PSdeG é "100% de Pontevedra" tras elixir o PPdeG ao coruñes Pedro Puy como número un
O secretario dos socialistas de Pontevedra lembra que nos pasados comicios tamén a coruñesa Yolanda Díaz foi de número un por Pontevedra.
Por E.P. | SANTIAGO DE COMPOSTELA | 19/06/2023 | Actualizada ás 19:08
O cabeza de lista do PSdeG ao Congreso pola provincia de Pontevedra, David Regades, destacou que a candidatura dos socialistas é "100% de Pontevedra" e "involucrada co territorio" fronte a partidos con candidatos de "outras xurisdicións" ou mesmo doutras comunidades autónomas.
"Vímolo fai catro anos, cando pola provincia de Pontevedra participou Yolanda Díaz, sendo doutra provincia; e vémolo agora como o PP trae a unha persoa, un militante de Santiago, a alguén que vive en Santiago pola provincia de Pontevedra", sostivo.
Así o destacou este luns en declaracións aos medios acompañado por integrantes das candidaturas do PSOE ás eleccións xerais do próximo 23 de xullo, entre eles a 'número un' ao Senado, Carmela Silva.
Na súa intervención, Regades destacou que a candidatura do PSdeG-PSOE nace da "democracia interna do partido" fronte a outros partidos que optan pola "designación da súa dirección". "A nosa candidatura escolleuse pola militancia, polos e as militantes da provincia de Pontevedra, que por unanimidade escolleron os seus representantes para as próximas eleccións xerais", sostivo.
