Sinkevicius advirte sobre o futuro da pesca: "Aos mozos cada vez atraélles menos esta nobre profesión"

O comisario de Medio Ambiente, Océanos e Pesca, Virginijus Sinkevicius, puxo o foco na importancia das novas tecnoloxías e en combustibles máis eficientes para avanzar na descarbonización do sector.

Así o fixo á súa chegada ao cume informal de ministros de Pesca da Unión Europea, celebrado en Vigo no marco da Presidencia española do Consello da Unión Europea. Ante os medios de comunicación, Sinkevicius reivindicou que non se pode desenvolver unha pesca sustentable e eficaz coa tecnoloxía dos anos 60 ou 70, polo que é importante proporcionar todas as ferramentas necesarias e as embarcacións á industria.

O obxectivo é lograr unha pesca "menos daniña", segundo dixo, e que supoña menos emisións de dióxido de carbono (CO2), ademais de lograr unha industria rendible. Para conseguilo, el insistiu en que a tecnoloxía é o principal obstáculo actual, xa que hai moitas ferramentas que aínda se están probando e descoñécese como serán os barcos do futuro.

Ademais da renovación da frota, tamén se referiu á substitución xeracional xa que, a pesar de que a pesca é unha profesión "moi nobre", aos mozos "cada vez atráelles menos". Preguntado sobre o veto á pesca de fondo, Sinkevicius quixo "ser claro" e asegurou que o plan presentado pola a Comisión non inclúe a prohibición da pesca de arrastre de fondo "como tal". Pero si dixo que é importante analizar a eficiencia das diferentes artes de pesca e dos combustibles.

Ademais, mostrouse aberto a debater sobre cambios nos sistemas de medición do arqueo dos barcos, unha solicitude que se pediu tamén desde España.

CEG

Por outra banda, o presidente da Confederación de Empresarios de Galicia (CEG), Juan Manuel Vieites, e a presidenta da Comisión Mar-Industria da CEG, Isabel Canas, mantiveron unha reunión coa directora executiva da Axencia Europea de Control da Pesca (EFCA, polas súas siglas en inglés) na que expuxeron a necesidade de que sexan comisarios diferentes os que se encarguen de Pesca e Medio e Océanos.

Coincidindo co encontro informal de ministros de Pesca que se celebra en Vigo, a CEG quixo trasladar as necesidades do sector á EFCA, xa que "sería desexable que fosen abordadas no encontro, aínda que parece que non vai ser así", segundo lamentou a organización nun comunicado. Para a CEG, a "prioridade" é a problemática da expulsión de barcos en España, Portugal, Francia e Irlanda, en zonas consideradas como ecosistemas mariños vulnerables.