Por E.P. | SANTIAGO DE COMPOSTELA | 19/07/2023 | Actualizada ás 18:15
Paula Maior e Cristian Caruncho foron os gañadores do XVIII premio Castelao de Banda Deseñada convocado pola Deputación da Coruña. Segundo informou a Deputación, na modalidade xeral foi seleccionada a obra 'Rosalía Oculta' da autoría de Paula Maior, e na modalidade LIX foi seleccionada a obra 'O día de San Martiño' de Cristian Caruncho.
Nesta edición o xurado estivo composto por ilustradores cunha "recoñecida traxectoria" na creación de banda deseñada como David Rubín, Emma Ríos, Anabel Colazo e os gañadores do pasado ano Siqi Luís Yang e Uxía Larrosa. Da obra 'Rosalía Oculta' o xurado remarcou a súa orixinalidade á hora de abordar un xénero como biográfico escapando do relato histórico para pór o foco na parte humana da icona literaria.
Ademais, valoraron positivamente a estética "moi delicada" que casa "perfectamente" co espírito romántico e decimonónico da obra de Rosalía de Castro. Por outra banda, da obra 'O día de San Martiño' o xurado puntualizou que o rural galego "é o latemotiv" que escolle o 'western' e o manga como soportes para achegalo a "unha ampla audiencia" abordando a mestura de xéneros dunha "forma honesta e madura".
Desta forma, incidiu no valor do debuxo e a narrativa "moi ben executados" e o "descaro divertido" que enlaza "moi ben" todos os xéneros dentro da cultura pop. Cada un dos premios está dotado con 6.500 euros, ademais da publicación das obras.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.