Arco Iris pide "controlar a nova especie invasora", o xabaril, e "aparcar" a caza do lobo
"Cada día se producen dez accidentes de tráfico en Galicia provocados por esta nova especie invasora, coa complicidade da Xunta", denuncia.
Por Europa Press / Redacción | SANTIAGO DE COMPOSTELA | 08/09/2023 | Actualizada ás 10:17
A asociación ecoloxista Arco Iris pediu "aparcar" a caza do lobo, ante o anuncio da Comisión Europea de revisar a estratexia de protección desta especie, e apostou por "controlar" a presenza do xabaril.
A través dun comunicado, advirte de que, a pesar de levar protexido 32 anos en toda Europa pola Directiva de Hábitats (DH), o lobo pasará a ser peza de caza en moitas zonas, incluída Galicia, sen "importar" que a poboación se reduza a 93 mandas --segundo o último censo-- e a unha poboación de medio milleiro de exemplares.
Pola contra, a poboación do xabaril supera xa os 200.000 exemplares, dos que ao redor de 17.000 caen cada ano en batidas organizadas, segundo indica Arco Iris. A entidade lamenta que España e outros 11 países presionasen ao comisario de Medio Ambiente para flexibilizar a caza do lobo e agora a presidenta da Comisión Europea, Úrsula von der Leyen, púxose "ao lado de quen pretenden cambiar" a directiva. Neste sentido, denunciou que "o seu cambio de opinión foi causado pola súa experiencia persoal" de que un lobo macho "acabou cun poldro da súa propiedade".
DATOS "FIABLES"
Ademais, e "dada a incapacidade da Xunta para pór orde nesta confusión", Arco Iris dirixiu senllos escritos de queixa tanto á Comisión Europea como á propia Consellería de Medio Ambiente, indicando que "a presión sobre o lobo redundaría nunha invasión do xabaril, xa que o lobo é o seu único depredador natural".
Por todo iso, insta á Xunta a pospor calquera decisión ata o 22 de setembro e a enviar "datos fiables á CE", sen transmitir "a idea peregrina de que en Galicia podería haber ata mil exemplares, senón moitos menos".
Ademais, a entidade ecoloxista require que Medio Ambiente "estableza de inmediato un plan rigoroso de control do xabaril", co fin de evitar maiores danos humanos e materiais, tendo en conta que cada día se producen "dez accidentes de tráfico en Galicia provocados por esta nova especie invasora, coa complicidade da Xunta".
