Por E.P. | SANTIAGO DE COMPOSTELA | 22/09/2023 | Actualizada ás 18:56
Este sábado 23 de setembro, ás 8,50 horas, comezará o outono no hemisferio boreal e vaise a prolongar ata as 4,27 do 22 de decembro. O paso do verán, neste caso pouco chuvioso aínda que máis que o anterior, prodúcese cando o sol chega ao momento Libra da eclíptica, un dos puntos de intersección deste plano co ecuador celeste.
De forma semellante a cando empeza a primavera, estamos nas datas nas que teoricamente a noite e o día teñen a mesma duración, de aí a orixe da palabra equinoccio coa que se coñecen estas dúas épocas do ano, explica a Universidade de Santiago de Compostela (USC).
Entre os fenómenos astronómicos máis destacables desta nova estación está o eclipse parcial de lúa do 28 de outubro, que poderá contemplarse entre as 21.25 horas e as 22.52 horas, aínda que terá unha baixa magnitude, segundo indicaron o director do Observatorio Astronómico Ramón María Aller da USC, Ricardo Docobo.
A choiva de estrelas Xemínidas, unha das máis importantes do ano, alcanzará o seu máximo o 14 de decembro. Este ano estará favorecida pola ausencia de lúa e espérase que poidan observar uns 150 meteoros/hora desde lugares con moi baixa contaminación luminosa.
Outras choivas de estrelas desta época como as Dracónidas, as Oriónidas, ou as Leónidas terán moita menos intensidade. En canto a cometas, unha vez pasado o máximo brillo do Nishimura, haberá ocasión de seguir con prismáticos o 103P/Hartley, que pasará o 12 de outubro pola súa posición máis preto do sol (perihelio), estando entón proxectado na constelación de Xémini.
Días despois, na contorna das constelacións de León e a Cabeleira de Berenice, verase o cometa 2P/Encke, tamén con prismáticos, neste caso, antes do amencer. "Os planetas Saturno e Xúpiter estarán visibles nas noites de todo o outono, en tanto que Venus vai ser o luceiro da alba e Mercurio poderá contemplarse ao amencer ata finais de outubro, e logo pasará a ser observado tras o atardecer", explicou Docobo.
CHOIVA
No meteorolóxico, finaliza un verán pouco chuvioso, aínda que con máis precipitación que o ano anterior, especialmente en setembro. En total, medíronse 204,8 litros/m2. "O feito de que a maior parte da precipitación deste verán fose nocturna, provocou a sensación de que a estación foi moito máis seca do sucedido en realidade", observou o profesor Docobo, quen lembra que neste século houbo veráns de moita maior seca, como o de 2016 con só 72 l/m2 e 2010, con 54,8 l/m2.
No que vai de ano, a choiva recollida no pluviómetro na estación meteorolóxica do Observatorio ascende a 1.008 litros/m2, superando claramente os 670 l/m2 rexistrados en 2022 ao final do verán. Con todo, no que resta de ano terían que caer outros 800 l/m2 para chegar á media anual da cidade de Santiago de Compostela, que rolda os 1.800 l/m2.
TEMPERATURAS
Sobre as temperaturas, os días nos que a temperatura superou os 30 graos en Santiago foron sete e ningún deles en xullo: 36º2 o 8 de agosto; 35º5, 23 de agosto; 35º4, 22 de agosto; 31º6, 24 de xuño; 30º8, o 23 de xuño e o 21 de agosto; e 30º5, o 7 de agosto.
A temperatura máxima de xullo foi de 28º2 (o día 26) e no que vai de setembro, o 14 foi o máis caloroso, con 29º8. En canto ás temperaturas mínimas, a máis baixa de todo o verán correspondeuse aos 10º1 rexistrados o 16 de xullo, sendo a mínima máis elevada a da noite do 23 de agosto, cando non baixou dos 21º8.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.