Rede Aberta estenderá ata o faro de Fisterra a rede de Internet de alta velocidade
O Goberno destaca o investimento de 24 millóns para implantar fibra na provincia da Coruña e a Xunta pide que se cumpran prazos.
Por Europa Press / Redacción | SANTIAGO DE COMPOSTELA | 29/09/2023 | Actualizada ás 18:58
A compañía Rede Aberta inaugurou este venres o inicio da extensión da rede de fibra de alta velocidade ata o faro de Fisterra, que forma parte dun plan de implantación de conexión a Internet ao que o Goberno destina na provincia da Coruña un total de 24 millóns.
Este venres tivo lugar un acto para celebrar a posta en marcha da liña, ao que asistiron representantes da compañía, a Subdelegación do Goberno na Coruña e a Xunta, que pediu o cumprimento de prazos no plan para estender as liñas de alta velocidade ao rural galego.
"É posible chegar ata o 'Finis Terrae' coa fibra óptica, unha infraestrutura de comunicación esencial na era da dixitalización e que, ata hai pouco, pensábase que era só para as grandes cidades e as contornas urbanas", destacou o CEO de Rede Aberta, Pete Antentas.
A empresa con sede en Santiago é a adxudicataria da segunda convocatoria do programa Unico de banda ancha na provincia da Coruña. No faro de Fisterra, Rede Aberta anunciou que comezará a implantar a principios de 2024 no municipio coruñés a tecnoloxía 50G-PON, que permite unha velocidade de 50Gbps.
Pola súa banda, a subdelegada do Goberno na Coruña, María Rivas, lembrou que o compromiso do Goberno é que "o 95 % da poboación galega" teña acceso a Internet de alta velocidade en 2023 e que, dous anos máis tarde, a cobertura sexa total.
Neste sentido, o director da Axencia para a Modernización Tecnolóxica de Galicia, Julián Cerviño, instou ao Executivo central a cumprir con estes prazos para estender a cobertura de internet de alta velocidade ao rural.
