BNG e PSdeG mostrarán "alternativas" no debate sobre o estado da autonomía, no que o PP exhibirá o "proxecto de futuro" de Rueda

O BNG e o PSdeG aproveitarán o Debate sobre o Estado da Autonomía que se celebrará no Parlamento de Galicia a próxima semana para tratar de evidenciar as súas "alternativas" fronte a un PPdeG disposto a exhibir o "proxecto de futuro" que representa o seu líder, o presidente da Xunta, Alfonso Rueda.

Os grupos marcaron este martes na Xunta de Portavoces da Cámara galega a orde do día do debate de política xeral que arrinca o vindeiro luns, día 9 de outubro, e que se estenderá ata o mércores. A cita política suporá a estrea do máximo mandatario autonómico nun Debate sobre o Estado da Autonomía tras a súa toma de posesión en maio de 2022.

Os populares galegos, tal e como destacou o seu portavoz parlamentario, Alberto Pazos, exhibirán o "proxecto de futuro" que encabeza o seu líder, Alfonso Rueda, cun "liderado indiscutible" e "recoñecido por todos os que formamos parte deste proxecto".

O portavoz do PPdeG na Cámara galega destacou que o presidente fará balance da súa xestión e presentará novas propostas para "afrontar as dificultades polas que atravesa Galicia", moitas "coincidentes co conxunto de España", como a inflación, o novo modelo de financiamento autonómico, as dificultades para cubrir algunhas prazas de especialista de medicamento, ademais dos problemas relacionadas coas infraestruturas como "o bloqueo" do traspaso da AP-9 e o "atraso" na chegada dos trens Avril.

Alberto Pazos considerou tamén que a cita política servirá par "evidenciar" a "falta de proxecto alternativo" tanto no BNG como no PSdeG, aos que criticou que coincidan en erixirse na "alternativa única". "Agora mesmo coñecidas temos tres alternativas únicas, a do BNG, a do PSdeG, e a alternativa única que pretende presentar tamén Sumar", dixo para sinalar que dúas delas --en referencia ao PSOE e a Sumar-- aínda sen candidato nin data prevista para definilo.

"Como non hai liderado, tampouco hai proxecto", dixo Pazos, que considerou que o "único punto en común" destes é "estar en contra do proxecto do PPdeG". "Uns ofrecemos un proxecto que trouxo prosperidade, estabilidade, rigor e unha mellora constante dos servizos públicos; e outros nos ofrecen políticas de empobrecimiento leas permanentes, promesas baleiras e unha deterioración constante dos servizos que din defender", afirmou.

PROXECTO DO BNG PARA UNHA GALICIA "PUXANTE, DINÁMICA E MODERNA"

Pola súa banda, o viceportavoz parlamentario do BNG Luís Bará sinalou que o Bloque fará visible a súa "alternativa" para unha Galicia "de futuro, puxante, dinámica, moderna, orgullosa e feminista", un proxecto alternativo ao do PP que tras 14 anos na Xunta deixa unha "Galicia que vai a menos" cun goberno "teledirigido desde Madrid" e que chega ao final de mandato "desfondado".

Fronte a esa Galicia que "non para de ir para atrás" froito dun goberno "descabezado" e "sen enerxía", destacou que o BNG presentará un proxecto de futuro para "abrir unha nova etapa na historia do país", consciente de que o debate "supón o inicio da conta atrás para o cambio".

Neste sentido, considerou que se poderán ver dúas posibilidades de liderado. Por unha banda, Alfonso Rueda, "un líder sen carisma, gris, un burócrata ao que nin os seus ven como líder" e, pola outra, a Ana Pontón, "co carisma, o liderado e a forza necesaria para ser a primeira presidenta da historia de Galicia".

A alternativa do Bloque, engadiu, pivotará sobre tres grandes eixos: o autogoberno, o financiamento e a ciencia e innovación. Tres ámbitos "fundamentais para mellorar a vida dos galegos e das galegas" ao redor dos que a formación proporá "grandes acordos de país para que Galicia dun salto adiante".

Ademais de medidas en ámbitos como a enerxía, a emerxencia climática, a cohesión territorial, o benestar e os servizos públicos, o BNG levará á cita política propostas de resolución para axudar ás familias que máis o necesiten no actual contexto de crise inflacionista.

Na súa intervención, o parlamentario nacionalista sostivo que a enerxía do cambio que representa o BNG e o liderado de Ana Pontón explican o "nerviosismo" e a "hiperactividade" do PP, ao que ve "inmerso nun vórtice propagandístico", con anuncios que parecen "saldos de fin de tempada" nunha "carreira desesperada de última hora" que inclúe xira polos estudios da CRTVG. "Xa só fáltalle asistir a un reality show", afirmou Bará, que ironizou para recomendar ao presidente da Xunta que participe en Sobreviventes.

"SÓLIDA E CRIBLE"

Pola súa banda, a viceportavoz do Grupo Socialsita, Begoña Rodríguez Rumbo, destacou que o portavoz parlamentario, Luís Álvarez, empregará o debate para "facer balance dos 14 anos de precarización e recortes" de Feijóo e Rueda e presentar o "proxecto sólido do PSdeG como única alternativa" ao PP. Rodríguez Rumbo anunciou un modelo socialista centrado na recuperación demográfica, cun enfoque transversal do que participen todos os departamentos do Goberno galego para frear a perda de poboación.

Así, indicou que presentarán un proxecto centrado na defensa dos servizos públicos e o Estado do Benestar, partindo do reforzo da sanidade coa mellora das condicións laborais dos profesionais sanitarios de Galicia. Entre outras medidas, os socialistas reclamarán blindar a educación pública e recuperar a gratuidade dos libros de texto, ademais dun modelo económico centrado no desenvolvemento sustentable, emprego de calidade e garantir unha política de vivenda pública despois de anos de "deixamento" desde ao Xunta. Tamén defenderán un novo modelo industrial e o desenvolvemento do pacto local.

"CERVEXAS"

A parlamentaria do PSdeG sinalou ao presidente da Xunta que o seu cargo implica "algo máis que repartir cheques e convidar a cervexas", en alusión á última campaña anunciada polo PP coa que quere "empezar a coñecer Galicia despois de 14 anos no goberno e un ano como presidente".

Ademais, tras cuestionar que Rueda empregue o seu "primeiro e último Debate do Estado da Autonomía" para darlle o pistoletazo de saída á precampaña das eleccións autonómicas, sostivo que o presidente galego só pode ofrecer "un modelo fracasado". "Desde que chegou ao goberno hai un ano non tivemos un só dato que fose a mellor", indicou.

Reunión da Xunta de Portavoces do Parlamento de Galicia na que se fixou a orde do día do Debate sobre o Estado da Autonomía que se celebrará a partir do 10 de outubro na Cámara galega | Fonte: PARLAMENTO DE GALICIA