Miguel Jove, sobriño de Amancio Ortega, entrará no consello de administración de Altia como dominical

A tecnolóxica galega Altia celebrará o próximo 13 de novembro unha xunta xeral extraodinaria de accionistas na que se proporá o nomeamento de Miguel Jove Ortega (sobriño de Amancio Ortega) como conselleiro dominical da compañía en representación de Incio Investimentos, o 'holding' controlado por Josefa Ortega, irmá do fundador de Inditex e nai de Miguel Jove.

A finais do pasado maio o investidor indio Ram Bhavnani vendeu a Incio Investimentos o 5,66 % da súa participación en Altia por ao redor de 11 millóns de euros, unha porcentaxe da compañía co que o 'holding' controlado por Josefa Ortega ten dereito a solicitar un asento no máximo órgano de decisión da compañía.

Deste xeito, a firma galega someterá á aprobación dos seus accionistas que Miguel Jove Ortega sexa conselleiro dominical durante os próximos catro anos e tamén elevar a 11 o número de membros do organismo, integrado nestes momentos por 10 persoas. A celebración da xunta xeral extraordinaria de accionistas de Altia está prevista en primeira convocatoria para o 13 de novembro, aínda que en caso de non alcanzarse o quórum necesario haberá unha segunda convocatoria para o día seguinte, segundo a información remitida por Altia ao BME Growth.

Altia rexistrou un beneficio neto de 10,2 millóns de euros en 2022, un 16,6 % máis que no exercicio anterior e o maior na historia da firma. Ademais, facturou 167,2 millóns de euros, cun crecemento do 32,8 % tras incorporar ao seu perímetro a Bilbomática e Wairbut. En tanto, o beneficio bruto de explotación (Ebitda) do grupo elevouse a 16,2 millóns de euros, o que supuxo un incremento do 18,4 % en termos interanuais.

Sede de Altia | Fonte: ALTIA - Arquivo