Abrente pide unha lista unitaria galega para as xerais
Esta corrente do BNG aposta por unha lista con xente de esquerda nacionalista e non nacionalista que teña, entre outros, coma fin, a conformación dun grupo galego propio no Congreso e Senado.
Por Galicia Confidencial | Compostela | 06/06/2015 | Actualizada ás 09:00
Abrente, o colectivo que integra aos militantes de Máis Galiza que decidiron quedar no BNG e co que simpatizan rexedores como Sandra González, de Tomiño, ou Fernándo Suárez, de Ribadeo, entre outros, acaba de pedir, abertamente, que o bloque participe e apoie a conformación dunha candidatura unitaria galega con xente de esquerda nacionalista e non nacionalista.
Con todo, pide que esta lista se reúna arredor dun programa común que, ao menos, asuma como principios a conformación dun grupo galego no Congreso e no Senado , a defensa dos intereses da maioría social, o recoñecemento do dereito a decidir do pobo galego e a rexeneración ética e democrática.
Nun comunicado, este grupo, que lidera Carlos Aymerich e Ana Luísa Bouza, destaca os resultados acadados en Galicia o pasado 24M e saúda que “unha grande maioría de galegos e galegas apostasen por alternativas políticas que, en clave galega e progresista, debuxan un novo panorama político en Galiza”.
De feito, suliñan que en Galicia haberá tres alcaldes nacionalista xa que, ademais de Miguel Anxo Fernández Lores, do BNG, en Pontevedra, Abrente destaca a chegada de Martiño Noriega, de Compostela Aberta, a Santiago, e de Xulio Ferreiro, da Marea Atlántica, na Coruña. “Pontevedra, Santiago e A Coruña xunto cos doutras decenas de municipios medios e pequenos, vaian estar gobernados por alcaldesas e alcaldes nacionalistas pertencentes a diversas forzas políticas e candidaturas cidadás”, apunta.
Finalmente, suliña que tamén hai numerosos concellos onde o BNG avanza. Con todo, puntualiza que son naqueles nos que “o Bloque segue a ser percebido como unha
alternativa de goberno viábel, útil e aberta á maioría social. Ese debe ser o camiño para o conxunto do país e para o conxunto da organización”, conclúe.
A posición de Abrente xa a fixo pública, tamén, un dos seus dirixentes, Carlos Aymerich, esta mesma semana, coa que coincide, en parte, outro destacado militante do Bloque e da UPG, Afonso Eiré. Outros, pola contra, como a escritora Marica Campo aposta por manter a liña actual de non pactos con non nacionalistas aínda que iso implique perdir apoio social.
