Nancho Novo protagoniza El cavernícola, o monólogo máis representado da historia de Broadway

Os teatros da Fundación Galicia Obra Social (Afundación) en Vigo e Pontevedra acollerán a vindeira semana El cavernícola, o monólogo máis representado da historia de Broadway, protagonizado na súa versión para España polo actor coruñés Nancho Novo e dirixida por Marcus von Watchel. 

As representacións terán lugar o xoves 18 e o venres 19 de xuño no Teatro Afundación Vigo, ás 21.00 h e 22.00 h respectivamente e o sábado 20 de xuño no Auditorio Sede Afundación de Pontevedra, ás 21.00 h. As entradas están dispoñibles a través das canles habituais da entidade, en www.ataquilla.com ou ben en na billeteira telefónica no 902 504 500 e nas sedes de Afundación de Santiago de Compostela, Ourense e A Coruña, nas billeteiras da Central de Espectáculos de Vigo e no recinto do espectáculo o propio día da función.

Cualificada por The New York Times como un «fenómeno único», El cavernícola foi escrita polo actor californiano Rob Becker durante máis de tres anos nos que realizou estudos informais de antropoloxía, prehistoria, psicoloxía, socioloxía e mitoloxía. Coas súas particulares percepcións sobre o feminismo contemporáneo, a sensibilidade masculina e as zonas eróxenas, a obra aproxímase aos temas cotiás das relacións de parella cun gran sentido do humor. A obra representouse desde a súa estrea en máis de 32 países e foi traducida a 16 idiomas. Só en Estados Unidos vírona máis de dous millóns de espectadores e, desde  a súa chegada a España en 2009, representouse ininterrompidamente no Teatro Fígaro de Madrid, sumando máis de 1300 funcións e 400.000 espectadores nas súas seis tempadas en cartel.