Plan de inspección educativa para este curso: programas europeos, figura de coordinador de benestar e FP dual
Por Europa Press / Redacción | SANTIAGO DE COMPOSTELA | 09/11/2023 | Actualizada ás 14:05
A Consellería de Cultura, Educación, Formación Profesional e Universidades publicou o plan de inspección educativa para o curso 2023-2024 no que se inclúen novas supervisións relativas a programas europeos deste departamento, a recente figura de coordinador de bens e a implantación da FP dual, entre outros.
O Diario Oficial de Galicia (DOG) publica este xoves este plan que recolle cuestións que non aparecían hai un ano, tales como un correcto funcionamento do programa Acompaña, supervisión da implantación nos cursos pares do currículo Lomloe, así como agrupación de áreas en primaria e agrupación de materias en ESO. Aos programas de supervisión habitual de cada ano súmase un plan de formación por provincias para a acollida de inspectores de novo ingreso e seguimento de protocolos de matriculación en centros (con especial incidencia no segundo curso de bacharelato).
Outros puntos a incluír serán a supervisión da función directiva, así como o asesoramento aos centros que desenvolvan Proxectos de Formación Permanente do Profesorado (PFPP) e para os centros que imparten ensinos profesionais de música e danza ou coa condición de deportistas de alto nivel.
Esta resolución asinada pola directora xeral de Ordenación e Innovación Educativa, Judith Fernández Novoa, lembra que o traballo de inspección educativa non se limita á realización das actividades recollidas no plan, senón que "intervén nunha multitude de situacións imprevisibles caracterizadas pola inmediatez, que implican a realización doutras actuacións puntuais e sobrevindas".
