Rueda sobre o conflicto dos bombeiros: "Quero que se resolva... a nosa proposta é xenerosa"

Os bombeiros comarcais anunciaron este venres novas mobilizacións na rúa para pedir a estabilización laboral e mellores medios nos parques comarcais. Un conflicto que leva meses atascado sen que haxa unha solución por parte das administracións, tanto da Xunta, como das deputacións provinciais, que son das que dependen estes profesionais.

Preguntado ao respecto na rolda de prensa posterior ao Consello da Xunta, o presidente galego lamentou este conflicto e lembrou que xa existe desde a súa época de vicepresidente. "Quero que o conflicto se resolva", indicou. De feito, a dirección xeral de Emerxencias e Interior dependía directamente da súa consellería. "A verdade é que foise mellorando pouco a pouco e de xeito sensible a situación", dixo ao tempo que lembrou que hai xa sete parques comarcais e mellores condicións laborais.

Así, lembrou que hai unha proposta conxunta da Xunta e das catro deputacións, pero que os bombeiros, "ou a súa representación sindical", non está de acordo con ela. "Pero o que non poden facer é dicir non a todo", dixo. "Todas as partes teñen que ceder porque nunha negociación todos ceden e a proposta é xenerosa", concluíu.