O futuro de Madeira Fiber podería pasar polos sectores do moble, a automoción e o funerario

A conselleira de Economía, Industria e Innovación, María Jesús Lorenzana, trasladou este luns aos membros do comité de empresa de Madeira Fiber un informe independente que propón vincular o futuro da empresa a tres sectores: o do moble, o da automoción e o funerario. Segundo trasladou a Xunta, con esta reunión de seguimento cos representantes dos traballadores a administración autonómica trata de colaborar na procura dun investidor. O obxectivo, sinalou, é atopar alternativas industriais viables que manteñan tanto a actividade como o emprego.

Así mesmo, destacou que a Consellería de Economía, Industria e Innovación está a colaborar coa de Emprego en posibles liñas de formación dirixidas ao persoal traballador para que poidan mellorar a súa cualificación profesional ante un eventual cambio de sector. No encontro, María Jesús Lorenzana tamén se comprometeu a realizar un seguimento periódico da situación. Manterán reunións cada tres ou catro semanas para poder analizar calquera novidade que se poida producir, co fin de garantir un diálogo aberto e permanente.

A conselleira de Economía, Industria e Innovación, María Jesús Lorenzana, mantén un encontro con representantes de Madeira Fiber | Fonte: XUNTA - XOÁN CRESPO