A Xunta deseca dúas charcas na área protexida das Catedrais
Adega lamenta a “escasa sensibilidade” da Administración autonómica e cualifica de “duro golpe” á proposta de declarar este espazo Parque Natural, defendida por institucións, investigadores e ecoloxistas. As charcas tiñan varias especies protexidas de anfibios.
Por Galicia Confidencial | Ribadeo | 13/08/2015 | Actualizada ás 13:08
A Xunta acaba de aprobar un Plano de Conservación da área das Catedrais pero, a pesar diso, acaba de encher con terra dúas charcas que se atopaban en áreas sensibles, unha dentro do ZEC As Catedrais e outra 200m fóra, mais pertencente á unha área prioritaria para a conservación da avifauna ameazada.
Trátase de dúas canteiras abandonadas, rexeneradas naturalmente e agora encharcadas, das poucas zonas húmidas permanentes na rasa litoral da Mariña. Segundo denuncia a organización ecoloxista Adega, as obras consistiron no aterro da zona inundada, “arrasando coa rica biodiversidade que acubillaban e derramándoas como refuxio de aves invernantes e en paso”.
Entre as especies protexidas presentes nesas charcas cóntanse varias de anfibios: A Hyla arborea (vulberábel segundo o Decreto 88/2007 polo que se establece o Catálogo Galego de Especies Ameazadas) e o Alytes obstetricans (Anexo IV Directiva 92/43 CEE, de interese comunitario que require protección estricta), teñen presenza confirmada, e o Triturus marmoratus (Anexo IV Directiva 92/43 CEE), o Lissotriton boscai e Lissotriton helveticus, no calágo español, son de presenza probábel.
Adega lembra que a costa de Ribadeo nesta zona da rasa litoral emerxida está considerada, ademais de ZEC, LIC, Monumento Natural (As Catedrais), ZEPA (Ribadeo), e Reserva da Biosfera (Oscos-Eo-Burón) e é unha área prioritaria para a avifauna ameazada por Resolución da DXCN de 28 de novembro de 2011.
“A riqueza ornitolóxica deste territorio atrae a moitos/as investigadores e visitantes, que agora perderán -perderemos- dous humidais senlleiros nos que mesmo aniñaban a pita de río, o mergullón pequeno, o rascón..., aliás de acubillar a especies en paso e invernantes”, indica nun comunicado.
Por iso, lamenta a “escasa sensibilidade” da Xunta, “que asiste nos seus fuciños e en plena tempada turística á destrución destas charcas e á perda da biodiversidade que acubillan, malia a gozaren de numerosas figuras de protección”. Unha actuación que cualifica de “duro golpe” á proposta de declarar este espazo Parque Natural, defendida por institucións, investigadores e ecoloxistas fronte á negativa da Xunta.
