Policías locais de Boiro declaran que o seu ex-xefe nunca lles pediu que retirasen unha denuncia
As supostas denuncias non tramitadas afectaban a persoas que tiñan algún tipo de relación co antigo xefe da Policía Local de Boiro.
Por Europa Press / Redacción | SANTIAGO DE COMPOSTELA | 28/02/2024 | Actualizada ás 17:22
Varios axentes da Policía Local de Boiro declararon este mércores que o que era entón o seu xefe, Manuel Feás, "nunca pediu que se retirase unha multa" e que era "moi meticuloso" no seu traballo.
Así o dixeron na sede compostelá da Audiencia Provincial da Coruña que acolleu a primeira sesión do xuízo contra o que foi ata 2019 xefe da Policía Local de Boiro, acusado de irregularidades na tramitación de 12 multas.
Durante a sesión declararon tres gardas civís, encargados de analizar a documentación despois de que o Concello de Boiro denunciase supostas irregularidades. O tres dixeron que detectaron na listaxe de denuncias que había "propostas de sanción que non foran tramitadas", aínda que sen apuntar o motivo ou o culpable.
Ademais, distintos axentes dixeron que, tras pór unha denuncia, o comprobante introducíase nunha caixa de correos do que só tiña a chave o procesado. Posteriormente, era necesario cumprimentar o informe e darlle traslado á súa tramitación ben a tráfico ou ben ao Concello. A terceira opción, en caso de detectar un erro, era declarar a denuncia nula.
Aínda que o acusado era o que adoitaba realizar a listaxe de boletíns para dar traslado ao instrutor, os policías apuntaron que eles tamén o facían e que, dado que as noites eran momentos de menos traballo, adoitaban aproveitarse para marcar e cumprimentar as denuncias pendentes, algo que non só realizaba o procesado.
As supostas denuncias non tramitadas afectaban a persoas que tiñan algún tipo de relación co ex-xefe. Foron investigadas en 2019, despois da súa suspensión, a requirimento da alcaldía, dixeron dúas das testemuñas, que analizaron os documentos de ata cinco anos atrás.
Este é o segundo caso que enfronta ao ex-xefe da Policía Local de Boiro e ao Concello nos tribunais. A inicios deste mes, a sección sexta confirmou a absolución de Manuel Feás noutra causa, na que o acusaban dun delito de malversación por unha presunta compra irregular de roupa, calzado e munición para o corpo. Ambos os casos teñen a súa orixe en 2019, cando foi cesado do seu cargo á fronte da Policía Local de Boiro e se fixo un repaso de distintos aspectos da súa xestión. No xuízo aberto non exerce acusación Fiscalía, se non só o consistorio boirense.
