Aparece o cadáver dunha muller de 55 anos no río Xallas, ao seu paso por Dumbría

O corpo sen vida dunha muller de 55 anos de idade foi localizado este luns no río Xallas, ao seu paso pola localidade coruñesa de Dumbría. Segundo informa o 112 Galicia, foron os axentes da Garda Civil quenes recuperaron o cadáver, despois de que os xestores do 112 contactasen coa compañía encargada do encoro do devandito río para conter o caudal e facilitar o rescate do mesmo.

Esta operación levouse a cabo á primeira hora da mañá, aínda que o corpo non foi recuperado ata pasadas as 11.00 horas. A Garda Civil continúa investigando o suceso, do cal o 112 tivo constancia precisamente a través das forzas da orde. Segundo fontes da Benemérita, constaba unha denuncia da familia sobre a desaparición desta muller o pasado venres.

Todo iso despois de que o seu coche aparecese aparcado en Ponte Olveira, preto do río ao seu paso polo municipio de Mazaricos, a un quilómetro de onde se atopou o corpo este luns. Cabe esperar á autopsia para coñecer máis detalles do ocorrido. Nestes instantes está na zona a autoridade xudicial para o levantamento do cadáver. Dáse a circunstancia de que este mesmo luns o corpo doutra muller foi recuperado na praia de Bimbieiro, en Ortigueira. A vítima atopábase en paradoiro descoñecido desde este domingo.

Imaxe do rescate | Fonte: GARDA CIVIL