A segunda e terceira fase da restauración do Parque do Pasatempo adxudicarase antes de dous meses

A segunda e a terceira fase da restauración do Parque do Pasatempo de Betanzos estará adxudicada antes de dous meses "no marco dos prazos estipulados para garantir a súa execución", informa a Xunta.

Tras a visita da secretaria de Estado de Turismo, Rosana Murillo, ás actuacións e a preocupación expresada pola alcaldesa de Betanzos, María Barral, sobre as fases pendentes, a Xunta subliña que Turismo de Galicia, de quen dependen estas dúas fases das obras, "está a cumprir de maneira escrupulosa todos os prazos". "E, tras quedar deserto en dúas convocatorias, abriu inmediatamente un procedemento de negociado sen publicidade que está nestes momentos en fase de licitación", remarca.

Ademais, explica que as actuacións son a segunda e a terceira fase das obras e se estruturan en dous lotes: no primeiro, realizarase a restauración da parte norte da primeira terraza e, no segundo, procederase, entre outras cuestións, á restauración do circuíto hidráulico.

O parque Pasatempo en Betanzos. Recuperado de 'Galicia pueblo a pueblo'