O BNG reprocha á Xunta unha política próxima a Vox tras a supresión da Secretaría Xeral de Igualdade

A conselleira de Política Social e Igualdade, Fabiola García, comprometeu máis recursos para abordar a violencia de xénero, en resposta a unha interpelación do BNG no pleno do Parlamento galego con reproches dos nacionalistas á supresión da Secretaría Xeral de Igualdade e á política do PPdeG nesta materia.

A titular autonómica tamén aproveitou para demandar ao Goberno central a creación de novos xulgados de violencia de xénero nas principais cidades galegas, unha petición, engadiu, "ignorada polo Executivo de Sánchez e que impide dar resposta ao crecente número de denuncias". "Somos a segunda comunidade coa taxa de violencia de xénero máis baixa de España", argumentou a conselleira ao rexeitar que, como sostivo a deputada nacionalista Noa Presas, exista un "retroceso" nas políticas do PP nesta materia tras a constitución do novo Goberno autonómico.

"Cárganse a Secretaría Xeral de Igualdade, acantoan a violencia machista e a igualdade", aseverou cuestionando que se optase por senllas "direccións xerais", unha medida na que a conselleira defendeu a creación da Dirección Xeral de Loita contra a Violencia de Xénero. "Un PP que comparte cada vez máis a axenda da extrema dereita", incidiu Noa Presas nunha intervención na que lembrou as 7.438 vítimas de violencia machista en todo o ano en 2023, o que supón un incremento do 7,6 % respecto de 2022, con tres mulleres asasinadas, ás que sumou o caso contabilizado este ano.

MEDIDAS DE PREVENCIÓN

Fronte ás críticas da deputada do BNG, quen reprochou ao PP que non acordase os xulgados que agora reclama cando gobernaba no Estado e acusoulle de levar "15 anos incumprindo a Lei de Igualdade", a conselleira manifestou que incentivarán as medidas de prevención; potenciaranse as casas de acollida ou se lles dotará de máis servizos con programas específicos para mulleres con adiccións.

A iso, sumou outras actuacións como os centros de crise 24 horas ou o reforzo da atención psicolóxica ás mulleres nos núcleos rurais ou a nova Lei de Igualdade de Galicia. "Por iso a Dirección Xeral de Loita contra a Violencia de Xénero, a única a nivel nacional", defendeu na súa resposta despois de que a parlamentaria nacionalista pedise, en resposta tamén ao escrito de máis de 40 organizacións feministas e doutros ámbitos de Galicia, que "rectifiquen" e recuperen a Secretaría Xeral de Igualdade.

"Escoiten ao tecido social", preguntou tras denunciar que coa súa eliminación o PPdeG rompeu o "consenso" e despois de que a titular de Política Social e Igualdade apelase a escoitar neste ámbito aos expertos e "afastarse de usos partidistas e tendenciosos", en resposta ás formulacións do BNG.

APOIO DO BNG A PALESTINA

Foi nun pleno no que a propia Noa Presas e outros parlamentarios nacionalistas acudiron cos panos palestinos. Na zona dos asentos había tamén colocados carteis nos que se podía ler 'Stop xenocidio en Gaza' e 'Palestina Libre'.

Violencia de xénero | Fonte: XUNTA DE ANDALUCÍA - Arquivo