"Consumía para manterme, non para colocarme", di un recluso de Teixeiro que tentou introducir droga no centro
Por Europa Press / Redacción | SANTIAGO DE COMPOSTELA | 21/05/2024 | Actualizada ás 11:59
Un recluso do centro penal de Teixeiro acusado dun delito contra a saúde pública recoñeceu que tentou introducir droga no cárcere á volta dun permiso, aínda que alegou que era para consumo propio.
"Era para consumir", manifestou durante o xuízo celebrado este martes na Audiencia Provincial da Coruña. "Consumía para manterme, non para colocarme", engadiu tras explicar que era consumidor habitual de heroína e a cantidade de droga incautada poderíalle "durar ata o seguinte permiso".
Fiscalía pide para o procesado catro anos e medio de prisión fronte á defensa que pide a absolución. Segundo recolle o escrito de acusación, os feitos remóntanse ao 21 de febreiro de 2020 cando o procesado regresaba ao cárcere de Teixeiro tras un permiso penal.
Cando se atopaba no aparcadoiro, os axentes achegáronse a el xa que sabían, segundo o Ministerio Público, que podía portar droga para introducila e vendela dentro do cárcere. Ao velos, o home lanzou á cuneta unha bolsa en cuxo interior se localizaron case nove gramos de heroína, cun valor no mercado próximo ao mil euros.
