Detidos dous mozos con antecedentes por un intento de roubo na casa dunha octoxenaria en Tui

A Garda Civil detivo o pasado domingo a dous homes, de 23 anos de idade, por un suposto delito de tentativa de roubo con violencia e intimidación nunha casa en Tui. Foron sorprendidos pola súa moradora, unha muller de 80 anos.

Segundo informa o Instituto Armado, a denuncia da vítima relata como, ao atoparse a un deles no interior da casa, empuxouna fortemente --causoulle lesións leves-- e emprendeu unha fuxida coa axuda do outro presunto responsable, que o esperaba fóra a bordo dun coche.

Tras alertarlles dos feitos, ao intre unha patrulla da Garda Civil interceptounos na A-52. A descrición achegada pola muller e por outras testemuñas que viran o coche coincidía cos dous ocupantes, polo que se procedeu á súa detención. Trátase de dous homes de 23 anos, con último domicilio en Biscaia e multitude de antecedentes policiais por feitos similares.

Ademais, no momento no que foron apresados, deron positivo indiciario na proba de detección de drogas, a falta de confirmación por parte do laboratorio. Os detidos e as dilixencias practicadas foron postos a disposición do Xulgado de Instrución número 1 de Tui, en funcións de garda, que decretou o seu ingreso en prisión.

Dous mozos con antecedentes detidos por un intento de roubo na casa dunha octoxenaria en Tui. GARDA CIVIL | Fonte: Europa Press