Precísanse doazóns de sangue dos grupos A negativo e 0 positivo

As reservas de sangue dos grupos A negativo e 0 positivo atópanse baixas en Galicia, mentres que as do grupo AB positivo están en niveis bos e as do resto en niveis normais. Así o informou este venres a Axencia de Doazón de Órganos e Tecidos (ADOS), que lembrou que a comunidade necesita sobre 500 doazóns de sangue cada día para o funcionamento dos hospitais e servizos de urxencias.

Para acudir a doar, ademais das oficinas de cada delegación de ADOS nas urbes, os cidadáns poden facelo aproveitando os desprazamentos das unidades móbiles, que a próxima semana volverán percorrer numerosas localidades galegas. En concreto, o luns estarán en San Sadurniño, A Coruña, Camariñas, Portosín, Porto do Son e Carnota, na Coruña; en Meira, en Lugo; na Rúa do Paseo de Ourense; e en Cambados, Nigrán e o barrio de Teis, en Vigo, dentro da provincia de Pontevedra.

Unha doante prepárase para doar sangue | Fonte: Jesús Hellín - Arquivo