Venres, día clave para o PSdeG: reúne aos seus deputados para coordinar a acción, centrada en industria e rexeneración democrática
Todo isto co horizonte posto no verán, período no que tamén queren situar a súa acción política na "blindaxe" dos servizos públicos como a sanidade, a educación ou a dependencia, segundo anunciaron.
Por Europa Press / Redacción | SANTIAGO DE COMPOSTELA | 27/05/2024 | Actualizada ás 14:01
O Partido Socialista de Galicia reunirá este venres aos seus representantes no Parlamento galego, Congreso, Senado e Eurocámara para coordinar a súa acción para os próximos meses, que pivotará sobre as demandas para a reindustrialización de Galicia e medidas para a "rexeneración" democrática. Así o anunciou este luns o secretario xeral do PSdeG e portavoz na Cámara autonómica, José Ramón Gómez Besteiro, que encabezará o encontro da Interpalamentaria dos socialistas galegos deste venres.
Nun contexto marcado pola campaña das eleccións europeas do próximo 9 de xuño, Besteiro incidiu en que os socialistas queren pór o foco en cuestións como o papel de Galicia en Europa, a transición enerxética ou a "rexeneración" das institucións democráticas do Estado. Todo isto co horizonte posto no verán, período no que tamén queren situar a súa acción política na "blindaxe" dos servizos públicos como a sanidade, a educación ou a dependencia.
Besteiro sinalou que pretenden "seguir o ronsel" marcado coa súa intervención no debate de investidura do pasado mes de abril pondo o acento nestes asuntos, aos que sumou tamén a necesidade de que Galicia asuma "novas competencias". Neste sentido, apuntou que cuestionarán ao Goberno galego se xa solicitaron formalmente a reunión da Comisión mixta de transferencias para abordar temas como o traspaso da AP-9 ou a nova lei galega do litoral.
