Hai pacto PP-PSOE en Santiago?
Socialistas e populares negan unha 'pinza' contra o goberno de Martiño Noriega e destacan que a proposta de IBI aprobada é a mellor para os veciños de Compostela. O BNG tamén critica a "arrogancia" do rexedor de Compostela Aberta.
Por Galicia Confidencial | Compostela | 11/11/2015 | Actualizada ás 08:00
Socialistas e populares negan as denuncias de pacto que lanzou Compostela Aberta tras votar conxuntamente unha proposta do PSdeG para baixar o IBI da capital galega, un imposto que o goberno de Martiño Noriega quería subir e que provocou as iras do rexedor compostelán.
"Se un xoga nun campo embarrado de democracia, coas regras en contra, consegue que unha candidatura de unidade popular sexa a lista máis votada e ao final nada vale porque calquera proposta ponse en cuestión e adóptase unha posición de pinza, só queda dicirlles que non viñemos aquí para agarrarnos á cadeira de brazos, senón mandatados para facer cousas diferentes", espetou este martes animando a estas dous formacións a presentar unha moción de censura.
Unha proposta que descartan desde os dous partidos que negan estas acusacións. O portavoz do PSdeG, Paco Reyes, dixo que é "moi difícil" que se produza nun futuro un marco de acordo entre PP e PSOE, e lembrou que "no seu momento tivemos oportunidade e votamos por que o alcalde fose Martiño Noriega, e non temos motivos para cambiar".
Así, asegurou que non era "serio" retirar unha proposta para que o PP non vote a favor, tal e como pedía CA, e asegurou que "el non podía saber o que o PP ía votar". "Estaría encantado de saber que os populares querían apoiar a rebaixa no IBI, porque é o que a cidadanía necesita para permitir respirar un pouco ás persoas con máis dificultades, como as familias en paro ou os pensionistas", dixo.
Tamén o portavoz do grupo municipal do PPdeG, Agustín Hernández, negou chegar a un acordo co PSdeG para votar a favor da rebaixa fiscal, e asegurou que a decisión non se tomou "en clave de bloqueo", senón "en clave de cidade", para evitar un "prexuízo para a cidadanía".
Neste sentido, negou "pactos, acordos ou conversacións co PSdeG respecto da gobernabilidade da cidade". Explicou o seu apoio á baixada do IBI, tendo en conta que "o goberno non admitiu os acordos alcanzados por maioría na comisión", o cal cambiaría o seu "resultado". "Era a mellor opción para non prexudicar á cidadanía, xa que aprobar a subida de impostos era aprobar un saqueo", indicou. "Finalmente imperou o sentido común", engadiu.
Pola súa banda, o portavoz do grupo municipal do BNG, Rubén Cela, lamentou a posición "arrogante" de Compostela Aberta ao non "respectar" o ditame da comisión informativa de Facenda, que depararía un pleno diferente.
"Eu respectaría as decisións das comisións informativas que son reflexo da composición do pleno e do que decidiu a cidadanía de Santiago nas urnas", dixo con respecto á decisión de Compostela Aberta de non aceptar o IBI ao 0,54.
"Poderiamos vivir un pleno diferente se o punto de partido fose aceptar as emendas que estaban aceptadas na comisión, e que contemplaban conxelar o IBI ao 0,54, posición defendida polo BNG e, ao seu xuízo, máis sensata", indicou.
Por iso, recriminoulle ao goberno local que "puido facer máis" e denunciou un "intento de engano" pola súa banda, primeiro "porque non é certo que a presión fiscal de Santiago sexa das máis baixas de Galicia" e segundo porque "as ordenanzas fiscais de Compostela Aberta non eran progresivas", senón que contemplaban unha "subida xeneralizada para ricos e pobres", concluíu.
