Denuncian que a Xunta estafa 33 millóns das pagas extras dos funcionarios

Os funcionarios aínda teñen pendente de cobrar 33 millóns de euros das pagas extras suprimidas pola Xunta segundo denuncia CIG-Autonómica. Unha cantidade que está recoñecida por catro sentenzas xudiciais que recoñecen o dereito a 1/3 do complemento específico na paga extra de xuño de 2013 e os xuros desde a data de reclamación.

Unha destas sentenza, estima na súa totalidade a recuperación da totalidade dos dous complementos específicos das pagas extras do 2013 e mesmo condena a 400€ en custas procesuais á Xunta. As catro sentenzas son firmes e non cabe recurso. 

No ano 2013, o goberno de Feijoo decidiu recortar este complemento nas dúas pagas extras de todo o seu persoal pasando a ser Galicia unha das escasas comunidades nas que se aplicou un recorte adicional. “Recorte que continúa hoxe en día e que está previsto que se prorrogue até o 2017 e co que aproximadamente están a quitarnos uns 200 millóns de euros por ano”, indica.

Por iso, estas sentenzas inciden nos fundamentos xurídicos das sentenzas que xa recoñeceran o pagamento dunha parte da extra de Nadal de 2012, polo que o recorte dos meses anteriores de xaneiro e febreiro, apunta, “é ilegal”.

“Desde o 2013 levamos advertindo á Xunta deste tema pero como quen oe chover, polo que só cabe cualificado de estafa a gran escala e que calculamos constitúe para todo o persoal da Xunta ao redor de 33 millóns de € sen contar custas e xuros de demora”, engade.

“Uns sobrecustos e saturación da vía xudicial que lle da igual facer fronte á Administración autonómica porque non sae do peto dos seus responsables políticos. Destacamos que a Xunta é plenamente consciente do seu comportamento pero xoga co efecto numérico das demandas. Un comportamento habitual nas eléctricas ou compañías de telecomunicacións pero que nunha Administración pública resulta vergoñento”, conclúe.