Unha transexual no deporte galego
O Calasancias coruñés fai ficha a Antía Fernández, que debutará este domingo co seu equipo na Segunda División de voleibol feminino. Mudegá felicita o club coruñés pola súa aposta pola normalización da transexualidade.
Por gcdeportes | A Coruña | 21/01/2016 | Actualizada ás 12:43
A asociación Mulleres Deportistas Galegas (Mudegá) ven de anunciar que o club Padre Faustino de voleibol (Calasancias) fixo ficha á deportista transexual Antía Fernández, a cal podería debutar este mesmo domingo no equipo B do club coruñés. Mudegá manifesta a súa satisfacción e apoio á decisión adoptada polo club coruñés e considera que esta medida é unha forma de normalizar a transexualidade na sociedade e no deporte galego.
Antía Fernández é unha transexual que dende sempre quixo practicar deporte e sempre atopaba problemas para fichar por un club pola lexislación existente. Ata que o Club Padre Faustino (Calasancias da Coruña) decidiu dar un paso adiante e permitir a esta muller poder desenvolverse tamén no deporte.
O Calasancias presentou a solicitude de ficha para esta deportista ante a Federación Galega e esta lle foi concedida, polo que Antía poderá cumprir este domingo o seu soño. A deportista galega debutará este domingo (12.00 horas) no pavillón do colexio das Calasancias no partido Calasancias Coruña B-C.V.A.B. da Segunda División sénior feminina.
Mudegá considera que este feito é un paso importante adiante na integración social e permitirá darlle normalidade a transexualidade no deporte. “Para dar pasos adiante é necesario ir cambiando as normas, como leva sucedendo ao longo de toda a historia para permitir a participación das mulleres en competicións deportivas”, sinalan dende Mudegá.
