Por M.V. | Santiago de Compostela | 23/01/2016 | Actualizada ás 20:47
A operación anticorrupción Operación Frontino provocou a dimisión Fernando Ramos esta semana. A Audiencia Nacional sospeita que o número 3 da Vicepresidencia de Soraya Saenz de Santamaría fixo de intermediario para que a empresa pública Acuamed pagara indebidamente a reparación dunha potabilizadora a FCC. No sumario figura un correo de Ramos apremando a tal pago.
Alternativa Galega de Esquerda lembra que a empresa estatal Acuaes, que traballa a miúdo en Galicia, é irmán de Acuamed e, de feito, tiñan unha directiva idéntica cando se produciu o suposto escándalo de pagos indebidos e inflados a construtoras.
En que proxectos participou Acuaes en Galicia? Un dos máis destacados é a polémica depuradora de Ferrol, onde se cobraba a taxa de saneamento á veciñanza sen que a EDAR estivese en funcionamento. Dúas das construtoras que participaron nesta depuradora son a citada FCC e ACS (esta última do presidente do Real Madrid Florentino Pérez). As dúas coñecidas construtoras viron como directivos seus eran detidos na primeira fase da Operación Frontino.
Acuaes colaborou tamén na construción da EDAR de Vigo. Dáse a circunstancia de que Acuaes solicitou á Xunta que aportase 5 millóns de euros por subrecustes, a maiores dos 125 que tiña que achegar nun principio.
AGE lembra que o dimitido subsecretario de Presidencia, Fernando Ramos de Armas, en asistido a actos públicos de sinatura de convenios coa antiga Consellería de Medio Ambiente para obras deste tipo. O ex-número 3 da Vicepresidencia tamén levou as negociacións coa Xunta para o saneamento da Ría do Burgo.
Ante estas circunstancias, AGE esixe unha auditoría completa de todos os proxectos onde puideran intervir estas empresas públicas no país e que se de conta no Parlamento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.