A neve cobre media Galicia
Concellos das catro provincias galegas, especialmente de Lugo e Ourense, atópanse nevados. En Manzaneda acumúlanse ata 70 centímetros de neve. En varios puntos é necesario o uso de cadeas. Vídeos e fotos no interior.
Por Galicia Confidencial | Compostela | 27/02/2016 | Actualizada ás 11:38
Boa parte da provincia de Ourense e de Lugo, así como as zonas altas de Pontevedra e da Coruña amenceron nevadas polo temporal de frío que padece Galicia este sábado. De feito, as nevadas das últimas horas están a condicionar a circulación rodada en varios puntos da alta montaña.
Polo momento, ningunha estrada da rede viaria sufriu cortes de tráfico durante a madrugada, informou a central que se ocupa da atención á coordinación das emerxencias en Galicia.
En Pedrafita do Cebreiro é obrigatorio o uso de cadeas e quedou prohibida agora a circulación de vehículos articulados na LU-633 que comunica con Triacastela. En Ourense hai este mesmo impedimento, pero para vehículos articulados, en cabeza de Manzaneda, na OU-0704. De feito é neste concello onde as condicións metereolóxicas son máis adversas, con acumulacións de neve de ata 70 centímetros.
En Pontevedra aconséllase circular con precaución no Deza e é precisamente esta provincia na que se están contabilizando un maior número de incidencias, concretamente 19 entre o nove da pasada noite e o seis da madrugada.
Séguelle Ourense, onde se rexistraron cinco, e aínda que a alerta laranxa por neve non afecta á Coruña, o xeo dificultou circular en Ordes, Cerceda e Melide. En Cerceda un home, que resultou ferido leve, sufriu por esta causa unha saída de vía co seu vehículo na vía que une Culleredo co Mesón do Vento.
Así estaba o Cebreiro na tarde deste venres:
