Cantos residuos radioactivos hai no fondo do mar fronte as costas galegas?
Unha expedición francesa busca bidóns radioactivos na nosa costa e a Xunta esixe información ao Goberno
Por Europa Press / Redacción | SANTIAGO DE COMPOSTELA | 26/06/2025 | Actualizada ás 16:57
A Xunta, a través da Dirección xeral de Calidade Ambiental, solicitou ao Consello de Seguridade Nuclear, dependente do Goberno, información sobre a expedición oceanográfica francesa que, segundo sinala, "localizaría máis dun milleiro de bidóns con residuos radioactivos en fondos mariños fronte á costa galega". Nunha carta remitida ao secretario xeral do Consello de Seguridade Nuclear, a directora xeral de Calidade Ambiental, María José Echevarría, solicita información a este departamento no marco das funcións da Xunta "en materia de residuos dentro da Comunidade autónoma de Galicia".
Así mesmo, lembra que a normativa sitúa ao Consello de Seguridade Nuclear como o organismo competente en seguridade nuclear e protección radiolóxica, incluíndo a supervisión e control dos residuos radioactivos. Neste contexto apunta que, co "único obxectivo de manterse informada", a Administración autonómica agradecería que se lles trasladase se desde ese organismo está a levarse a cabo algún tipo de seguimento técnico ou ambiental en relación con estes achados.
Precisamente, varios medios publican que o buque oceanográfico francés L' Atalante localizaría o primeiros mil barrís con restos radioactivos fronte a Galicia.
O BNG ESIXE INFORMACIÓN Á COMISIÓN EUROPEA
Tamén sobre este asunto, nun comunicado, a eurodeputada do BNG Ana Miranda explica que se volveu a dirixir de novo á Comisión Europea para interesarse sobre os residuos radioactivos vinculados ás verteduras fronte á costa galega entre os anos 1940 e 1985. "Como eurodeputada do BNG dirixinme hoxe á Comisión Europea para lembrarlle que non fixo o seu traballo respecto da investigación dos residuos radioactivos da fosa atlántica", sinala.
Ana Miranda explica que se trata da cuarta pregunta que dirixe á CE sobre este asunto, na que reclama unha investigación europea. "Non pode ser que Galicia recibise o lixo europeo e que, a día de hoxe, a UE non tomase ningunha medida", subliña. Ana Miranda asegura que a propia Comisión Europea "recoñeceu a existencia de residuos nucleares fronte á costa de Galicia" e indicou que "carece de estudos actualizados sorbe o seu impacto", ademais de "pospor repetidamente a vixilancia da radioactividade mariña nas augas de Galicia".
