González Casares pide á Comisión Europea que avalíe o impacto dos bidóns radioactivos na Fosa Atlántica

O eurodeputado galego Nicolás González Casares (PSOE) trasladou á Comisión Europea unha serie de cuestións sobre a misión científica impulsada polo CNRS francés para estudar o estado dos bidóns de residuos radioactivos afundidos na Fosa Atlántica, así como o seu posible impacto ambiental.

A través dunha carta remitida nos últimos días, o representante socialista amosa a súa preocupación pola localización das verteduras, realizadas en décadas pasadas a escasa distancia da costa galega, e polo carácter transfronteirizo das súas consecuencias ambientais. Por este motivo, preguntou á Comisión se está a facer seguimento da misión científica liderada por Francia e se ten previsto participar ou contribuír á avaliación dos seus resultados.

Na súa misiva, González Casares lembrou que Bruxelas se ten negado en anteriores ocasións a realizar investigacións propias sobre esta fosa, malia recoñecer xa no ano 2017 que descoñecía o estado actual dos residuos radioactivos afundidos. Ante esta inacción institucional, subliñou que "a situación require unha resposta a escala europea" e insistiu en que é responsabilidade da Comisión garantir a transparencia e a seguridade ambiental en todos os territorios afectados.

O eurodeputado apelou ademais ao artigo 35 do Tratado constitutivo da Comunidade Europea da Enerxía Atómica (Euratom), que obriga aos Estados membros a controlar permanentemente os niveis de radioactividade na atmosfera, augas e solo. Neste marco, preguntou á Comisión se ten previsto incluír o litoral galego —zona potencialmente afectada polas verteduras históricas— no seu programa oficial de misións de verificación que se realizan para garantir o cumprimento desta normativa.

A Fosa Atlántica, situada fronte á costa de Galicia, foi obxecto de depositación de residuos radioactivos entre 1949 e 1982 por diversos países europeos. Nos últimos anos, colectivos ecoloxistas, científicos e representantes políticos veñen reclamando unha investigación en profundidade sobre a situación actual destes materiais e o seu posible impacto na saúde mariña e humana, sen obter ata o momento unha resposta coordinada por parte das institucións europeas.