O xulgado de Ferrol pon en liberdade ao investigado por unha agresión sexual tras retractarse a denunciante
A denuncia inicial describía unha agresión con arma branca e violencia, pero agora negan que fose verdadeira.
Por Europa Press / Redacción | Santiago de Compostela | 02/08/2025 | Actualizada ás 15:06
O acusado por unha agresión sexual en Ferrol, detido o mércores tras unha denuncia interposto por unha nova e que este venres permanecía na Comisaría da Policía Nacional, foi posto en liberdade sen fianza, aínda que permanece investigado por estes feitos.
Tras permanecer en dependencias policiais, pasou a disposición ao Xulgado de Instrución número 3 de Ferrol, en funcións de garda. Segundo informan fontes xudiciais, o xuíz impuxo sobre o aínda investigado, ademais da súa posta en liberdade, a prohibición de aproximarse e de comunicarse coa vítima.
Previamente, durante a xornada do venres, a moza que denunciara a agresión sexual e física durante a noite do martes ao mércores retractouse ante a Policía e alegou que os feitos non se produciron.
Fontes coñecedoras da investigación aseguraron a Europa Press que a muller recoñeceu --nunha declaración en comisaría na que estivo asistida, en todo momento, polo seu avogado-- que non houbera violación.
FEITOS PREVIOS
Segundo a denuncia presentada inicialmente, os feitos producíronse na Praza de España cando a muller se dirixía a unha vivenda na que reside actualmente, na rúa Galiano, ocupada por varias persoas. Relatara que ao pasar pola praza atopouse con catro novos, un deles coñecido, polo que se tomou unhas cervexas e consumiu algunha sustancia estupefaciente.
Engadiu que os homes comezarían a agredila e mesmo un deles chegou a sacar unha arma branca, para amedrentala, polo que dixo gritar. Como consecuencia diso, contou que tres deles abandonaron o lugar á carreira, pero outro quedou e agarrouna do pelo e arrastrouna ata a entrada ao aparcadoiro e un muro, onde a agrediu. Agora, segundo as fontes consultadas por Europa Press, retractouse.
