O PSOE advirte a Ciudadanos de que o suposto ofrecemento de traballo por sexo de Baltar "é corrupción política"

O voceiro do PSOE na Deputación de Ourense, Nacho Gómez, advirte a Ciudadanos da "especial situación procesual" na que se atopa o presidente deste ente provincial, o popular Manuel Baltar, a quen unha muller acusou de ofrecerlle traballo a cambio de sexo.

O grupo provincial socialista, este mércores a través dun comunicado, fai alusión á proposta da formación laranxa, relativa á extensión a comunidades autónomas e concellos das medidas incluídas no pacto anticorrupción co PP, entre as que atopa a separación inmediata dos cargos públicos imputados por corrupción.

Neste sentido, Gómez avisa de que "non hai tema máis importante e grave que a imputación do máximo representante da institución provincial polos cargos de suborno e tráfico de influencias, o que, ao seu ver, si constitúen delitos de corrupción política".

Ademais, afirma que o PSOE seguirá pedindo a dimisión de Baltar Blanco ata que se dirima a súa causa xudicial, e expresa a súa "preocupación" pola rexeneración política e a loita contra a corrupción, "sexa na administración que sexa".

RÉPLICA AO PP

Por outro lado, afea as acusacións dos populares na Deputación sobre o propio voceiro socialista. A este respecto, sinala que "o curioso" é que entren no "insulto infantil", mentres "gardan as costas" do xefe provincial.

"Non vou permitir que se difame e se retorza a realidade, acusándome de feitos radicalmente falsos,", sentenza. Ao fío diso, agrega que está a valorar a adopción de medidas legais contra estas declaracións "intolerables".