Por E.P. | Vigo | 13/10/2016 | Actualizada ás 14:38
Nuria, unha veciña de Vigo nai de tres fillos de 21, 17 e 14 anos de idade (o maior, cunha discapacidade por un trastorno psiquiátrico), urxiu este xoves axuda das administracións públicas para evitar verse "na rúa" o próximo 30 de outubro, ante a imposibilidade de facer fronte ao pagamento do aluguer da súa vivenda.
Esta muller, os ingresos mensuais da cal roldan os 650 euros (entre a pensión do seu fillo maior e unha pensión alimenticia do seu ex-marido), confirmou que lle acaban de cortar a luz, e que a empresa subministradora da auga lle informou que fará o mesmo nas próximas horas.
Nuria, que este xoves compareceu en rolda de prensa para dar a coñecer a súa situación, lamentou que recorreu aos servizos sociais do Concello e que non lle dan ningunha solución, á espera de que execute o desafiuzamento. Así mesmo, explicou que, aínda que o ano pasado recibiu unha axuda municipal para o pagamento do aluguer, este ano aínda non ten noticias de se volverá ter ese apoio económico, que volveu solicitar.
En todo caso, esta veciña de Vigo recoñeceu que, a día de hoxe, xa debe máis de 5.000 euros de aluguer, e que, cos ingresos que ten "tiña que elixir entre pagar a luz e a auga ou dar de comer" aos seus fillos, dixo.
REPROCHES A CABALLERO E Á XUNTA
"Ninguén me axudou en nada. Ata tiven que pagar os libros de bacharelato dos meus fillos. A miña próxima cita nos servizos sociais do Concello é para o 28 de novembro", denunciou, ao tempo que reprochou ao goberno local e ao alcalde, Abel Caballero, "que se lle encha a boca dicindo que en Vigo non hai desafiuzamentos nin se lle cortan as subministracións a ninguén".
Nuria foi citada para este venres na delegación da Xunta aínda que, segundo precisou, xa recorreu anteriormente á administración autonómica, que tampouco deu solución ao seu problema. Segundo explicou, intentou tramitar unha RISGA, pero non pode beneficiarse desta renda porque os seus ingresos (computando a paga do seu fillo e a pensión alimenticia) exceden o límite establecido.
Pola súa banda, o alcalde de Vigo, cuestionado acerca deste caso nunha rolda de prensa, admitiu que non coñece os detalles da situación desta familia, pero insistiu en que "a auga non se lle vai cortar". "Aqualia (a concesionaria deste servizo) non lle corta a auga a ninguén en Vigo", incidiu, e apuntou que "seguro que os servizos sociais están niso".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.