O conselleiro de Sanidade chama a "tomar cartas" ante o sobrepeso infantil, que afecta ao 25% dos nenos galegos
O decano de Medicina da USC insta a "combater" o consumo de alimentos pouco saudables coa súa prohibición en colexios
SANTIAGO DE COMPOSTELA | 03/11/2016 | Actualizada ás 19:45 por EUROPA PRESS
O conselleiro de Sanidade, Jesús Vázquez Almuiña, chamou as administracións e profesionais da saúde a "tomar cartas" ante o problema da obesidade e do sobrepeso infantil, así como da mala alimentación.
Na apertura da XVII Reunión da Sociedade Española de Nutrición en Santiago, Jesús Vázquez, mostrou a súa preocupación por que o 25% dos nenos galegos entre 6 e 15 anos -- baseándose en datos de 2013, segundo expuxo -- teñen sobrepeso, mentres que o 8% padece obesidade.
Ao respecto, considera a educación e a formación "as ferramentas máis poderosos" ante unha "tarefa hérculea", polo que insta a unha "posta en común de medios e coñecementos" para atacar o problema de forma conxunta. Ademais, lamenta que os nenos e novos "cada vez fan menos deporte".
Nesta liña, o decano de Medicina da Universidade de Santiago (USC), Juan Gestal, apelou a "combater" o consumo de alimentos "con moitas calorías" e baixo valor nutritivo, para o cal cre necesario "tomar medidas" como a súa prohibición en colexios, uns "bos impostos" e poñer na información dos menús a achega calorífica.
De tal forma, este é o "camiño" que vai o decano de Medicina da USC para "comezar a acantoar ese inimigo que é a epidemia da obesidade".
CONGRESO
A XVII Reunión da Sociedade Española de Nutrición, que se celebra na capital de Galicia dende este xoves e ata o próximo sábado, terá como "protagonista destacada" á dieta atlántica propia da Comunidade galega.
Así indicouno a presidenta desta cita, a profesora Isaura Leis, quen puxo en valor as achegas desta dieta, ao tempo que subliñou o carácter "multidisciplinar" deste congreso, cun programa científico e social.
Na inauguración na tarde deste xoves tamén estiveron presentes, entre outros, as conselleiras de Mar e Medio Rural, Rosa Quintana e Ángeles Vázquez; o reitor da USC, Juan Viaño; o xerente da área sanitaria de Santiago, Luis Verde; o presidente do congreso xunto a Leis, Alberto Cepeda; o presidente da Sociedade Española de Nutrición, Luis Moreno, e a concelleira de Políticas Sociais de Santiago, Cuncha Fernández.
