Antonio Casal, novo director territorial de Ence en Pontevedra e director de desenvolvemento e mellora continua

Antonio Casal Lago asume a dirección territorial de Ence en Pontevedra. Compatibilizará esta ocupación coa de director de desenvolvemento e mellora continua da pastera.

Tras cinco anos á fronte da fábrica de Ence en Pontevedra, a empresa destaca nun comunicado que a planta obtivo, baixo o liderado de Casal Lago, "resultados históricos" tanto en materia de mellora ambiental como operativa.

Ademais, nesta etapa implantáronse as técnicas de "mellora continua" e "calidade total" nas que "a nova Ence" basea a xestión de todos os seus centros de operacións.

Como novo director de desenvolvemento e mellora continua do grupo Ence, Antonio Casal responsabilizarase do desenvolvemento de novos produtos e da I+D do negocio de celulosa, ademais de coordinar a implantación da mellora continua en todos os centros de operacións do grupo.

En tanto que director territorial, será o representante e "a cara visible de Ence en Pontevedra", apunta a compañía. Antonio Casal asumirá as súas novas funcións a principios de febreiro de 2017, unha vez que se incorpore a Ence o novo responsable operativo da fábrica de Lourizán.