Crean o Comité Estratéxico de médicos galegos con personalidades deste campo
A entidade está impulsada pola Asociación de Médicos Galegos (Asomega), na que está o presidente da Cámara galega, Miguel Santalices, ou o delegado da Xunta en Madrid, José Ramón Ónega.
Por E.P. | SANTIAGO DE COMPOSTELA | 23/01/2017 | Actualizada ás 11:24
A Asociación de Médicos Galegos (Asomega) constituíu o seu Comité Estratéxico, un organismo composto por destacados perfís profesionais, a maioría vinculados ao ámbito sanitario, que servirá de apoio á institución para definir as súas liñas estratéxicas e grandes proxectos dende a cualificación que outorga a traxectoria dos seus membros.
Entre eles, segundo informou a asociación nun comunicado, destaca a presenza do presidente do Parlamento de Galicia, Miguel Santalices.
Ademais de Santalices, que "mostrou en todo momento un importante compromiso con Asomega", segundo valorou a entidade; o novo comité está formado por outros nomes como o de José Ramón Ónega, delegado da Xunta de Galicia e director da Casa de Galicia en Madrid, Miguel Carrero, presidente de Previsión Sanitaria Nacional (PSN); José María Pino, presidente de Sanitaria 2000; Roberto Conde, director executivo de Nutrición Médica; Carlos Cenjor, xefe do Servizo de Otorrinolaringoloxía da Fundación Jiménez Díaz; e Rafael Pérez Santamarina, xerente do Hospital La Paz.
A eles suman outros profesionais da Medicina como José Manuel Pérez Vázquez e Ramón Cadórniga. Con esta composición, Asomega constitúe un órgano que aglutina "distintas sensiblidades, dende a vertente política, a xestión hospitalaria ou a visión empresarial", segundo explica, e todo iso "dende unha óptica sanitaria incluinte que a vai reflectida na presenza de profesionais vinculados á sanidade pública, privada e concertada", segundo sinala.
En palabras do presidente de Asomega, Julio Ancochea, "este é un comité aberto". "Esperamos seguir incorporando profesionais que poidan sumar a difundir o labor que desenvolve Asomega en todos os seus campos de actuación", abundou.
Precisamente, a institución inaugurou un ciclo de conferencias que baixo o título 'Medicina e Humanidades', e organizado por PSN, que pretende poñer de manifesto "a necesaria unión entre a disciplina científica médica e a humanística para un óptimo desenvolvemento da Medicina en beneficio da sociedade".
