O MAC organiza este mes na Coruña talleres infantís sobre cociña e gravado

O Museo de Arte Contemporáneo Gas Natural Fenosa (MAC) organizará este mes dous talleres infantís sobre cociña e gravados, destinados a nenos e nenas entre 6 e 12 anos. Nesta iniciativa, "os máis pequenos aprenderán a desenvolver a súa capacidade creativa de forma lúdica e divertida a través da cociña e os gravados con punzón".

En concreto, realizará o taller 'Scrumptious!', "no que os pequenos aprenderán non só nocións de cociña, senón que poderán desenvolver un proxecto creativo completo, creando mundos xeniais con deliciosas e naturais materias primas".

O taller, que será impartido por Begoña Garea, fundadora de Cornelia Craft e Nerea Seijo, repostera e propietaria de 'Celebra con Olivia', celebrarase todos os sábados de febreiro, en horario de mañá.

Ademais, terá lugar a proposta 'O meu primeiro gravado: un tolo animalario ilustrado' no que os menores "van crear e estampar mediante tórculo manual os seus propios gravados". O taller será impartido pola artista e ilustradora Iria do Castelo.