Alvarellos Editora inicia a nova colección de libros infantís 'Verdemar'

Alvarellos Editora celebrou o seu 40 aniversario coa publicación dos dous primeiros títulos de 'Verdemar', a súa nova colección de libros infantís.

En concreto, xa están nas librarías o álbum ilustrado 'Queres ler un libro comigo?', escrito polo autor norteamericano Lawrence Schimel e debuxado polo artista de Sao Paulo Thiago Lopes.

Trátase dun conto para primeiras lecturas que convida a compartir e reflexiona sobre a diversidade. Publicada ata agora en Colombia, Brasil e Singapura, aínda que non en España, foi traducida ao galego por Quique Alvarellos.

Noutro dos títulos xa editados é 'Contos do Sol e da Lúa', de Helena Villar Janeiro, ilustrado por Ana Costas, que contén sete historias solidarias para ler a soas ou coa familia e que reivindican un mundo no que é posible a poesía, a diversidade, a superación e a maxia.

Nos próximos meses irán aparecendo nas librarías outros títulos da colección Verdemar, entre eles un conto de Quique Alvarellos baseado na historia do bosque do Banquete de Conxo.