Núñez Feijóo aposta por un sistema educativo que "anticipe as necesidades" da Galicia do futuro

O presidente da Xunta, Alberto Núñez Feijóo, trasladou este venres a aposta do Goberno galego por un sistema educativo que sirva para "anticipar as necesidades da sociedade galega do mañá" e no que cobrarán un peso especial o plurilingüismo e a formación tecnolóxica.

Así o adiantou durante a inauguración do novo curso de ESO, Bacharelato, FP e Ensinanzas Especiais nas instalacións do Instituto Blanco Amor de Ourense, onde o xefe do Executivo galego cursou Bacharelato e o Curso de Orientación Universitaria (COU) entre os anos 1976 e 1979.

"Hoxe é un día de sentimentos atopados" sinalou o presidente da Xunta tras visitar varias aulas e percorrer o centro inaugurado hai agora 50 anos e no que asegurou descubrir "os valores democráticos, da Constitución, a liberdade e o autogoberno de Galicia".

Na súa intervención, Núñez Feijóo reivindicou o papel dos profesores de Secundaria, porque "teñen a sorte de ir moldeando a sociedade galega do futuro" e "dar coñecementos e información en liberdade para que a semente que se plante creza forte e teñamos unha Galicia máis libre, solidaria e culta".

Núñez Feijóo referiu que o seu goberno afronta o reto dunha educación pública que "anticipe as necesidades" da "Galicia do mañá" a través dun proxecto educativo no que "todos os alumnos poderán educarse nun sistema plurilingüe e terán formación en robótica e programación".

BACHARELATO DE EXCELENCIA E LIBRO DIXITAL

Tamén apuntou á posta en marcha dun bacharelato de excelencia, que incidirá nas ciencias e as matemáticas; así como ao "libre acceso dos alumnos ao libro dixital".

O presidente da Xunta referiu que todas estas medidas atópanse incluídas dentro da folla de ruta da Estratexia Galega para a Educación Dixital 2020 que aprobou onte, xoves, o Consello da Xunta.

O xefe do Executivo galego tamén repasou a situación actual da educación galega, un escenario que cualificou "de ciencia ficción" para os que como el cursaron estudos durante a década do setenta.

UNHA EDUCACIÓN "DE CIENCIA FICCIÓN"

"En Galicia hoxe 90.000 persoas teñen transporte escolar gratuíto, ningunha familia deixa sen mandar aos nenos á escola por problemas económicos" e "o 92% dos mozos con necesidades de educación especial están integrados grazas ao excelente labor de máis de 3.000 profesionais", referiu o presidente.

Tamén incidiu en que na actualidade "máis de 100.000" mozos que reciben unha educación plurilingüe nalgún dos 80 centros de educación infantil de Galicia ou do catro centros de secundaria que, como o IES Blanco Amor, introduciron este sistema no bacharelato.

FORMACIÓN BILINGÜE

Antes do acto oficial de inicio do curso Núñez Feijóo entregou ao director do Instituto, Carlos Ferreiro, o certificado que acredita que forma parte do sistema de formación plurilingüe en Galicia.

Un dos alumnos falou en representación dos seus compañeiros e destacou a "importancia" de poder estudar a través dun sistema plurilingüe porque lles "permitirá desenvolverse mellor en inglés, que é tan importante hoxe en día".

Entre os asistentes ao comezo do curso escolar atopábanse o conselleiro de Cultura, Educación e Ordenación Universitaria, Román Rodríguez; o alcalde de Ourense, Jesús Vázquez; o presidente da Deputación, Manuel Baltar e varios dos ex profesores do presidente da Xunta.

Albino Núñez, profesor e director do IES Blanco Amor nos anos 70 lembrou "emocionado" o paso do presidente da Xunta polas súas aulas, "cando só había dous centros de formación oficial en Ourense". As profesoras de Núñez Feijóo foron unánimes "era o máis listo da clase".