(AM) O PSOE pedirá á Comisión Europea activar o Fondo de Solidariedade polos incendios

O secretario xeral do PSOE, Pedro Sánchez, avanzou que pedirá ao presidente da Comisión Europea, Jean-Claude Juncker, activar o Fondo de Solidariedade europeo para que se trasladen fondos a Galicia, Asturias e Castela e León para facer fronte aos danos causados pola onda de incendios dos últimos días.

Durante unha visita a Chandebrito, en Nigrán (Pontevedra), onde o domingo faleceron dúas persoas nunha furgoneta atrapadas polas lapas, Sánchez chamou á cautela nas declaracións, e antes de pedir responsabilidades políticas, xa que aínda se están sufocando as lapas.

Non entanto, adiantou que pediron a comparecencia no Congreso da ministra de Agricultura e Pesca, Alimentación e Medio Ambiente, Isabel García Tejerina, para que se pronuncie sobre a situación e indique cales van ser os mecanismos de resposta para resolver esta crise e previr para que non se volva a repetir.

Sánchez puxo en relevo que a visita deste martes, na que despois de ir Nigrán, tamén acudiu ás Neves e posteriormente a Vigo, ten como obxectivo "estar coa xente" e trasladar "a solidariedade, agarimo e compromiso" do PSOE para que un suceso como o deste fin de semana "non volva suceder ou evitar que sexa con esta magnitude".

En relación con iso, subliñou que o Partido Socialista leva tempo "denunciando a falta de políticas de prevención" por parte do Goberno popular, así como a "carencia absoluta dunha estratexia nacional de loita contra incendios".

Fronte a isto, insistiu en que é necesario ampliar recursos, implantar políticas preventivas, recuperar a estratexia do desenvolvemento do rural e "empezar a reconstruír a lexislación básica desmantelada polo PP", como son a lei de desenvolvemento do rural e a lei de montes.

"FRACASO" POLÍTICO

No mesmo acto, o secretario xeral do PSdeG, Gonzalo Caballero, transmitiu as súas condolencias aos familiares dos falecidos e aos afectados por esta "situación dramática" e, aínda que coincidiu en que hai que ser "cautos" nas declaracións, considerou que "é evidente que se manifesta un fracaso na política forestal e ambiental" do PP.

Non se pode "permitir que os cidadáns galegos teñan que esperar a que chova para ver as súas casas e vidas con posibilidades de solución", selou, antes de apuntar que unha vez que todos os incendios fosen extinguidos, será momento de analizar as responsabilidades políticas.