O fiscal acusa de fraude ao irmán de Telmo Martín

Ramón Martín González, irmán do candidato polo PP a alcalde Pontevedra, enfrontase a unha querela por defraudar á Facenda. O volume da fianza imposta por un xulgado de Cambados, máis dun millón de euros segundo publicou hoxe El País, dá idea da importancia do presunto fraude.

Ramón, que como Telmo tamén opera no sector inmobiliario, lideraría unha trama de empresas que intercambiaría facturas irreais para non ter que pagar impostos dos beneficios sacados das operacións inmobiliarias.

Un dos pagos non declarados involucra á inmobiliaria Sercoysa. Trátase dunha empresa da que o actual conselleiro de Infraestructuras, Agustín Hernández, foi apoderado dende agosto de 2005 até xaneiro de 2008.

Ramón Martín, segundo o fiscal, intermediaria para conseguir terreos para Sercoysa pero despois non declararía as facturas. Sercoysa é unha das firmas máis beneficiadas das adxudicacións de obras do Concello de Sanxenxo, que segue gobernando o PP,  da Deputación (que goberna o conservador Rafael Louzán) e da propia consellería de Infraestructuras. O departamento de Hernández adxudicou nesta lexislatura polo menos 2,3 millóns en obras á empresa da que foi directivo o Conselleiro.

Ademais, segundo confirmou GC no Rexistro Mercantil, Ramón Martín participa nas seguintes sociedades: Lauderhill International Trade, Suministros Industriales y Servicios Montenegro , Transportes Roalan Express sl., Kiam financial 2012 , Kendall Hispania Investment s.l. e Continental Consulting s.l., a maioría con sede na provincia de Pontevedra.

Abbaco Gestión Inmobiliaria S.L., Gestiones Empresariales de Pontevedra S.L., Redison Imexcom S.L. Unipersonal, Starnberg Business S.L. e Desarrollos y Proyectos Sacimar son outras das sociedades que está a investigar a Xustiza. Abbaco Gestión Inmobiliaria tería defraudado ao fisco por unha operación inmobiliaria en Sanxenxo, concello do que foi alcalde Telmo Martín.