Por Galicia Confidencial | Monforte de Lemos | 07/05/2018 | Actualizada ás 19:39
Os traballadores e traballadoras do hospital comarcal de Monforte continuarán coa folga. Así o manifestaron nun comunicado de prensa onde tamén destacaban "a tomadura de pelo" que para eles supuxo a reunión cos responsables do hospital.
No comunicado enviado aos medios dise que desde o equipo xerencial "non aceptaron ningún dos puntos da convocatoria de folga". Remarcan este punto ao falaren de aumentar o número de traballadores e traballadoras para o centro. "O máis importante, que é o aumento de persoal, nin o contemplan".
A contrapartida ofrecida pola xerencia foi a de "cambiar o tipo de contratación de tres enfermeiras". Desde o comité de folga ven nesta oferta e na actitude do equipo de dirección do hospital monfortino, como unha "tomadura de pelo" para tentar paralizar a folga.
Os traballadores e traballadoras do centro hospitalario de Monforte anuncian no comunicado de prensa que mañá ás 12:00 haberá unha concentración diante das instalacións hospitalarias, "e pedimos que toda a cidadanía participe".
Así mesmo, o venres día 11 de maio ás 10:00 da mañá sairá un autobús gratuito para facer unha concentración diante do Hospital Universitario Lucus Augusti.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.