Galicia non ten competencias para lexislar sobre custodia compartida

A Comisión Superior para o Estudo e Desenvolvemento do Dereito Civil Galego concluíu este luns que Galicia "non ten competencias para lexislar sobre a custodia compartida". Diso informou Vicepresidencia, nun comunicado, despois de que o pleno deste órgano consultivo acordase por maioría remitir un informe ao Parlamento galego no que se establece a falta de competencia autonómica para regular esta materia.

O vicepresidente da Xunta, Alfonso Rueda, quen no seu día trasladou o interese do Goberno galego en estudar que a custodia compartida puidese ser a "fórmula prioritaria" en situacións de ruptura de parellas con fillos, presidiu este luns unha nova reunión do pleno da Comisión de Dereito Civil.

Na anterior, o pasado 26 de abril, encargouse a elaboración dun informe que dese resposta á consulta realizada polo Parlamento galego para saber se a proposición de lei referira á corresponsabilidade parental, admitida a trámite após presentarse como iniciativa lexislativa popular, tería "encaixe nas competencias autonómicas ou correspondería ao ámbito estatal".

ARGUMENTOS

A Xunta remarca que a Constitución confire ás comunidades con dereitos especiais a posibilidade de conservar, modificar e desenvolver o seu dereito propio, pero "non de forma ilimitada". Así, a xurisprudencia do Tribunal Constitucional esixe que "exista unha conexión entre as figuras que xa existían e a nova materia a desenvolver".

O informe aprobado este luns, de carácter non vinculante, sinala que en Galicia "non destaca ningunha institución conexa" relativa ás relacións paternofiliais. Engade que os principios xurídicos que si existen refírense case exclusivamente á vía patrimonial, polo que non presentaría unha conexión suficiente.

Este estudo esgrime tamén, entre outros argumentos, que "non procede" reproducir preceptos estatais nas lexislacións autonómicas, en tanto considera que parte da proposición de lei pode ser vista como "unha reiteración do Código Civil", o que implicaría "a vulneración dos principios de competencia e seguridade xurídica". Ademais, no informe incluirase, de común acordo, a suxestión de que o Parlamento galego inste as Cortes Xerais para que regulen sobre esta materia.