Altos cargos do Sergas declararán sobre a subministración de medicamentos de Hepatite C

O Xulgado de instrución número 3 de Santiago retoma este mércores, 4 de xullo, as declaracións no marco da investigación que segue por supostas dilacións na subministración dos medicamentos a enfermos de Hepatites C e pola que permanecen investigados dous altos cargos do Sergas.

Concretamente, o día 4 está prevista a declaración do xefe da Unidade de Transplante Abdominal do Complexo Hospitalario Universitario de Santiago (CHUS) e membro de Batas Brancas, Evaristo Varo; e o día 5 a do médico do Complexo Hospitalario Universitario A Coruña (Chuac) Alejandra Otero. Ambas quedaran suspendidas o pasado 22 de febreiro debido á folga dos funcionarios de xustiza. Os que si declararon o 19 de febreiro foron familiares de vítimas mortais e enfermos de Hepatite C, cuxos casos foron incluídos na causa que segue Andrés Lago Louro e na que permanecen como dous altos cargos do Sergas: Félix Rubial e Carolina González-Criado.

Inicialmente, Lago Louro chamou aos membros do Sergas a declarar só como investigados por un delito administrativo, pero en decembro de 2016 a Audiencia Provincial da Coruña emitiu un auto no que estimou parcialmente o recurso da Fiscalía, ao que se adheriu a Asociación Plataforma de Afectados pola Hepatite C, e acordou citalos de novo por un suposto de delito de homicidio en seis do oito casos que incluía a causa.

O pasado mes de febreiro, á saída do xulgado onde fora citado, Evaristo Varo asegurou que tiña "ganas" de declarar ante o xuíz, despois de que a citación xa se tivo que suspender nunha anterior ocasión debido a que se atopaba nun congreso nacional que se celebraba en Santiago de Compostela. Entón, xa asegurara que tiña previsto contestar "as preguntas dos avogados da Xunta, do Sergas, avogados da plataforma de enfermos e Fiscalía". "Vou contar o que desgraciadamente vivín", apuntou, aínda que asegurou que o ocorrido non debe "emborronar" o sistema público sanitario.