Dous colectivos proporán no Parlamento galego crear un rexistro de maltratadores de animais

As asociacións Libera e Fundación Franz Weber inscribirán unha iniciativa cidadá no Parlamento galego para crear un rexistro de maltratadores de animais na Comunidade, un sistema de control para persoas condenadas penalmente ou sancionadas por vía administrativa en cuestións relacionadas coa protección dos animais.

A través dun comunicado, os animalistas propoñen esta fórmula para "evitar que persoas que exerceron crueldade contra os animais poidan comprar, ter ou adoptar" calquera especie "mentres se mantén a pena ou a sanción" e que serviría como sistema de intercambio continuo de información entre concellos, Xunta e corpos de seguridade.

Para cumprir coa normativa europea e estatal de protección de datos, o rexistro non tería carácter público total --apuntan as asociacións--, senón que disporía unicamente de datos persoais do agresor sancionado ou condenado as tendas de animais. Ademais, o sistema incluiría a maltratadores que se mudan á Comunidade galega.

Así as cousas, Fundación Franz Weber e Libera lembran que o Código Penal contempla inhabilitacións para a tenencia de animais por un máximo de 36 meses, mentres que a Lei de Benestar Animal de Galicia, aprobada hai pouco máis dun ano, posibilita estender esta sanción até os dez anos. Por iso, aseguran que o rexistro de maltratadores permitiría reforzar o cumprimento destes castigos.