Rede Localis di que as melloras na contratación dos concellos "reducen" os niveis de "corrupción"

A Rede Localis, Rede Local de Administración Pública, presentou este martes no Círculo de Empresarios de Galicia as súas propostas para mellorar a contratación pública local aproveitando a entrada en vigor da nova lei ao respecto. A respecto disto,  explicaron que os concellos galegos "manteñen as súas reservas", malia que os resultados se traducirían en diminuír a corrupción.

Neste sentido, desde Rede Localis manifestaron que as "potenciais melloras" que entraña este novo modelo de contratación pública "redundarían nun reforzo da calidade dos servizos públicos e nun elemento de especial relevancia: a redución da corrupción". Así mesmo, lembraron que os contratos municipais moven case un 20 por cento do PIB a nivel estatal. De aí a importancia destes contratos, segundo valoraron desde a Rede.

A Rede Localis presentou este martes o documento 'Contratación pública (Lei 9/2017): Dificultades para implantar o novo modelo no mundo local e propostas de mellora', asinado por Concepción Campos Acuña, codirectora da Rede e José Caamaño, profesor da Universidade de Santiago de Compostela.

Neste traballo realizaron unha enquisa nos consistorios galegos sobre "a realidade da implantación das novidades na contratación pública estratéxica" e exponse propostas de mellora.

PROPOSTAS

Estas propostas van desde escalar as esixencias legais en función do tamaño dos distintos concellos" ata "potenciar" o papel das Deputacións Provinciais, apostar pola "profesionalización da contratación pública", adoptar "medidas de fomento de contratación coas PEMES", ou "normalizar" pregos e documentos para facilitar unha contratación "socialmente responsable".

Os resultados da enquisa realizada mostraron que os concellos manifestan unha percepción "predominantemente negativa" sobre a adecuación do marco legal vixente á realidade municipal. "Non acaban de recoñecer e traducir á súa actividade contractual todo o abano de aspectos de interese público contemplados no novo modelo", apuntou Jose Caamaño.

"Preténdese que a contratación pública sirva para construír unha sociedade mellor e a iso están orientadas estas medidas. Entendendo que os municipios, máis de 8.000, son unha canle moi importante para que se cumpran estes obxectivos. En particular en Galicia, pola proximidade e a distribución da poboación, encárganse dos servizos nos que a cidadanía fai o seu día a día: abastecemento de auga, saneamento...", sinalou Concepción Campos Acuña.

A Rede Localis, Rede Local de Administración Pública, é unha rede sobre o municipalismo galego, da que forman parte profesores e investigadores das tres universidades galegas e profesionais do mundo local en Galicia.