Por Europa Press / Redacción | SANTIAGO DE COMPOSTELA | 11/02/2019 | Actualizada ás 16:56
O director xeral de Defensa do Monte, Tomás Fernández-Couto, reuniuse este luns cunha delegación de Portugal interesada en coñecer o traballo da Consellería do Medio Rural en materia de prevención e extinción de incendios forestais.
Trátase dun grupo de técnicos municipais da Comunidade Intermunicipal da rexión portuguesa de Coimbra, integrada por varios concellos do centro do país luso.
Fernández-Couto destacou que a prevención "é parte fundamental na loita contra os incendios" e sinalou que a Xunta destinará un total de 11,6 millóns de euros en 2019 para financiar os convenios de colaboración coas entidades locais galegas en materia de prevención e defensa contra os incendios forestais.
Na visita, o director xeral mostrou á delegación portuguesa o Centro de Coordinación Central de incendios forestais e subliñou a posta en marcha da rede de vixilancia dos espazos forestais, que conta con 44 centros "que permiten monitorar o 54% do territorio galego".
Así mesmo, Fernández-Couto destacou o convenio de colaboración subscrito entre a Consellería do Medio Rural, a Federación Galega de Municipios e Provincias (Fegamp) e Seaga, "que permitirá a creación dun sistema público de xestión de biomasa nas franxas secundarias para protexer os núcleos de poboación".
Pola súa banda, a delegación portuguesa mostrouse "moi interesada" no ámbito da limpeza franxas secundarias e na posibilidade de que a propia Administración poida actuar de forma subsidiaria nestes labores.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.