Por E.P. | A CORUÑA | 20/02/2019 | Actualizada ás 15:06
O alcalde da Coruña, Xulio Ferreiro, manifestou que o expediente para remunicipalizar a xestión das bibliotecas, a través da Empresa Municipal de Vivenda, Servizos e Actividades (Emvsa), está "bastante avanzado".
Por iso, manifestou que a próxima semana espera "ter noticias" e poder anunciar "algo en firme", dixo cando lle preguntaron se cre que será posible cambiar a xestión antes de que acabe a actual lexislatura. Ademais, confirmou que as actuacións a este respecto seguen "segundo os plans previstos", co obxectivo dunha xestión a través de Emvsa.
O rexedor coruñés realizou estas manifestacións antes da presentación do proxecto de innovación bibliotecaria e participación cidadá 'A eira', na biblioteca municipal da Sacra Familia. Sobre esta iniciativa, dixo que é un proxecto de "innovación social" para abrir "aínda máis ao barrio" a biblioteca, definindo as propostas que se realicen a través dos propios usuarios mediante un "proceso colaborativo".
RECOLLIDA DE LIXO
Entre outra orde de cousas, e preguntado pola existencia de lixo nalgúns colectores, o alcalde admitiu que "houbo algunha ruta que non se puido completar, pero que se reforzou durante a mañá". Así, limitou a algunha "incidencia puntual" estes feitos. "Pero nada comparable ao de hai 15 días", engadiu tras os residuos que quedaron sen recoller na cidade por problemas con vehículos da empresa encargada da recollida de lixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.