Por E.P. | SANTIAGO DE COMPOSTELA | 02/03/2019 | Actualizada ás 15:43
O candidato do BNG á alcaldía da Coruña, Francisco Jorquera, presentou unha "campaña participada e propositiva" na que, aos nomes xa ha anunciados, sumou ao ex reitor da UDC, Xosé Luís Armesto, á mariscadora Teresa Ramiro a Beatriz Gómez, activista de memoria histórica. Xusto un mes despois de avanzar o primeiro tramo da lista, o Bloque presentou este sábado a súa candidatura completa, "resultado dun consenso amplo", segundo subliñou Francisco Jorquera.
Así, a candidatura complétase con nomes como Xosé Luís Armesto, ex reitor da UDC no posto 27 que pecha a lista; Beatriz Gómez Amigo, activista social e da memoria histórica e veciña de Silva; Gonzalo Flores, enxeñeiro e funcionario da Xunta ou Roberto Tizón, funcionario do Concello. Tamén incorpora a Manuel Vázquez, membro da plataforma de emigrantes retornados ou a Anxa González, profesora xubilada.
Nomes cos que pechou a lista do BNG para as municipais de maio na Coruña, presentada durante a mañá na chaira de O Parrote, e que incorporaba no segundo posto á actual portavoz municipal do BNG e única concelleira da formación, Avia Veira.
A lista inclúe no tres á escritora Mercedes Queixas, no cuarto posto a Patricia Cordo, do Comité de Empresa de Extel, á actriz Isabel Risco, a Ricardo Vales, impulsor da Comisión en Defensa do Común ou a Xulio Moscowich, representante do Comité de Empresa de Alcoa. "É unha candidatura en positivo porque a forman persoas con enerxía e ilusión, é participativa, porque está integrada por persoas que participan activamente nos movementos sociais e en distintos espazos de intervención cívica" e formada por "persoas capaces e solventes" capaces de "un cambio serio na Coruña", subliñou Jorquera.
O candidato nacionalista incidiu en que "o cambio que Coruña necesita non é o da tripla alianza ultra" que trata de que se "retorne a un pasado en negro". E concluíu lembrando as palabras da eurodeputada nacionalista Ana Miranda, para definir o perfil humano das candidatas e candidatos coruñeses: "Como di Ana, somos unha candidatura de luz, traballo e poesía".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.