O lalinense Nicolás González (PSOE), "ilusionado" por ir nas listas ás europeas
Sobre a saída de José Blanco da candidatura, asegurou que para el é "unha das persoas a seguir"
Por E.P. | SANTIAGO DE COMPOSTELA | 17/03/2019 | Actualizada ás 19:22
O lalinense Nicolás González, que ocupará o posto número 9 da candidatura do PSOE para as eleccións europeas do 26 de maio, mostrouse "moi contento" por este "reto e este desafío" e avanzou que vai "dalo todo para estar á altura".
González Casares, en declaracións a Europa Press, asegurou que o exministro José Blanco "estaba descartado" antes de que el fose proposto, polo que incidiu en que "ninguén pense que foi un 'sácate ti para porme eu' ". Ademais, explicou que foi unha das primeiras persoas que o chamou para darlle a noraboa. De feito, afirma que José Blanco é para el "unha das persoas a seguir" e remarca: "Coma el tivemos poucos políticos en Galicia".
A súa inclusión na lista para Europa nos primeiros postos terá que ser agora valorada polo partido, posto que Nicolás González Casares era candidato á alcaldía por Lalín. Por tanto, quedará por confirmar se renuncia á candidatura e quen ocuparía o primeiro posto da candidatura.
