Fiscalía mantén as acusacións contra o alcalde de Cee e outras cinco persoas na 'Operación Orquestra'
O xuízo retomouse tras anularse as escoitas telefónicas e coa negativa da maioría dos procesados a declarar
Por E.P. | A CORUÑA | 26/03/2019 | Actualizada ás 14:03
O Ministerio Fiscal mantivo as acusacións contra o alcalde de Cee, Ramón Vigo, e outro cinco acusados na 'Operación Orquestra' -o concelleiro Juan Bautista Areas, dous empresarios, un arquitecto e un axente de orquestras-, nun xuízo que proseguiu este martes na Audiencia Provincial coruñesa.
Nun auto emitido o pasado 15 de marzo, a Audiencia coruñesa, atendendo á petición realizada nas cuestións previas polas defensas, anulou as escoitas telefónicas que deron orixe a esta causa. O Ministerio Fiscal expuxera que se se declaraban nulas as intervencións telefónicas retiraría as acusacións para os acusados, excepto a relativa ao concelleiro de Cee por confesión en sede xudicial.
Con todo, este martes confirmouse que mantiña a acusación, algo polo que mostraron a súa sorpresa os letrados, confiados en que a causa non seguiría contra os seus clientes ou a maioría deles. Así o avogado Felipe Mayán, que representa ao edil, cuestionou, en declaracións aos xornalistas, o que considerou unha "contradición".
"Non entendemos que vai alcanzar a preguntar", afirmou sobre Fiscalía e as testemuñas previstas nun xuízo que proseguirá o 2 de maio ante a imposibilidade de que algún dos policías puidese declarar este martes. Por este motivo, a Sala fixo un receso para tratar de localizar a algún e non dilatar máis os prazos desta vista o que, finalmente, non foi posible.
Sobre o seu cliente, o letrado do edil de Cee negou que exista unha "confesión" por parte deste e insistiu en que dixo, en sede xudicial, o mesmo que declarou este martes, ante a sección segunda da Audiencia coruñesa, só a preguntas do seu avogado.
NEGATIVA A DECLARAR
E é que só o edil e un empresario contestaron ás preguntas dos seus avogados, mentres que os demais non o fixeron nin a preguntas dos seus letrados nin da Fiscalía, entre eles o rexedor de Cee. Na súa declaración, un dos empresarios -son pai e fillo- recoñeceu que o seu proxenitor lle prestou 12.000 euros ao concelleiro, pero explicou que se tratou dun "préstamo" que o edil lles está devolvendo. "Quedan 3.000 euros", dixo en liña co exposto por Juan Bautista Areas.
Este, pola súa banda, manifestou que pediu ese diñeiro ao empresario porque eran amigos e porque tiña un "problema económico". Ademais, asegurou que tamén lle axudaron outras persoas. "Ardeume a casa e vinme apurado", expuxo. Con todo, rexeitou que fose para conseguir que ao empresario lle adxudicasen unha obra. "Decateime na Xunta de Goberno local", explicou sobre a citada adxudicación e recalcando que se lle concedeu con base en informes técnicos. "Non fixen xestións, nin mo pediu, nin a podería facer, nin a faría", engadiu.
No seu escrito de cualificación provisional dos feitos, polos presuntos delitos de falsidade documental, suborno e infidelidade na custodia de documentos, Fiscalía pide, inicialmente, para o alcalde de Cee ata 20 anos de prisión, ademais de penas de inhabilitación por presunta prevaricación. Para os demais acusados, solicita penas de entre un ano e seis meses de prisión e 9 anos e tres meses.
